ជាតិ
សេដ្ឋកិច្ច
ខេត្តព្រះសីហនុ នឹងក្លាយជាក្បាលម៉ាស៊ីនថ្មីមួយ សម្រាប់ជំរុញកំណើនសេដ្ឋកិច្ចកម្ពុជា
ទិដ្ឋភាពរួមនៃទីរួមខេត្តព្រះសីហនុ
×![]()
ព្រះសីហនុ៖ ៥ឆ្នាំចុងក្រោយនេះ ខេត្តព្រះសីហនុបានផ្លាស់ប្តូរមុខមាត់យ៉ាងខ្លាំង ដោយបានប្រែក្លាយពីខេត្តស្ងៀមស្ងាត់ ទៅជាខេត្តដែលមានសកម្មភាពសេដ្ឋកិច្ចដ៏មមាញឹក នៅក្នុងវិស័យទេសចរណ៍ និងវិស័យឧស្សាហកម្ម។ ជាពិសេសខេត្តនេះ បានក្លាយជាតំបន់តភ្ជាប់ផលិតកម្ម និងពាណិជ្ជកម្មក្នុងស្រុកយ៉ាងសំខាន់ ទៅនឹងបណ្តាប្រទេសនៅក្នុងតំបន់។ សន្ទុះនៃការអភិវឌ្ឍន៍ក្នុងខេត្តព្រះសីហនុ ទាំងវិស័យសាធារណៈនិងវិស័យឯកជន ដែលធ្វើឱ្យខេត្តមួយនេះ ក្លាយជាក្បាលម៉ាស៊ីនថ្មីមួយ ជួយជំរុញកំណើនសេដ្ឋកិច្ចកម្ពុជា ដ៏មានសក្កានុពល។
ការកសាងហេដ្ឋារចនាសម្ព័ន្ធនានា មានទាំងផ្លូវ៣៧ខ្សែ, ស្ថានីយប្រព្រឹត្តិកម្មទឹកកខ្វក់ទី១-ទី២ជាដើម នៅក្នុងទឹកដីខេត្តព្រះសីហនុ ក្រោមការចំណាយរបស់រដ្ឋាភិបាល រហូតជាង៣២០លានដុល្លារអាម៉េរិក ត្រូវបានដាក់ឱ្យប្រើប្រាស់ជាផ្លូវការ។ បើតាមសម្តេច ហ៊ុន សែន ការសម្រេចបាននូវសមិទ្ធផលទាំងនេះ គឺស្របទៅនឹងចក្ខុវិស័យរបស់កម្ពុជា ក្នុងការប្រែក្លាយខេត្តព្រះសីហនុ ឱ្យទៅជាតំបន់សេដ្ឋកិច្ចពិសេសគំរូពហុបំណង ដើម្បីឈានឱ្យក្លាយជាក្បាលម៉ាស៊ីនថ្មីមួយ សម្រាប់ជំរុញកំណើនសេដ្ឋកិច្ចជាតិ។
សម្តេច ហ៊ុន សែន កំពុងថ្លែងក្នុងពិធីសម្ពោធដាក់ឱ្យប្រើប្រាស់នូវហេដ្ឋារចនាសម្ព័ន្ធផ្លូវ៣៨ខ្សែ នៅក្រុងព្រះសីហនុ កាលពីថ្ងៃទី២ធ្នូ
ក្នុងពិធីសម្ពោធដាក់ឱ្យប្រព័ន្ធប្រព្រឹត្តកម្មទឹកកខ្វក់ និងផ្លូវ៣៧ខ្សែ រួមទាំងសមិទ្ធផលនានាក្នុងក្រុងព្រះសីហនុ កាលពីថ្ងៃទី២ធ្នូ ឆ្នាំ២០២១ សម្តេច ហ៊ុន សែន មានប្រសាសន៍ថា ៖ «នេះជាលើកដំបូង ដែលយើងប្រើការវិនិយោគផ្ទាល់រហូតដល់ជាង៣០០លានដុល្លារ នៅក្នុងទីក្រុងមួយ។ ប៉ុន្តែការងារនេះ វាចាំបាច់ណាស់ ដែលយើងត្រូវធ្វើសម្រាប់ការកសាងហេដ្ឋារចនាសម្ព័ន្ធ នៅក្នុងខេត្តព្រះសីហនុ ដែលយើងចង់ឱ្យកសាងខេត្តមួយនេះ ទៅជាពហុបំណងដែលនឹងទៅជាខេត្ត ដែលនាំមុខទៅដោយការកើនឡើងនៃសេដ្ឋកិច្ចរបស់កម្ពុជា»។
ការកសាងហេដ្ឋារចនាសម្ព័ន្ធក្នុងខេត្តព្រះសីហនុ គឺជារឿងចាំបាច់បំផុត ខណៈមានក្រុមហ៊ុនជាច្រើន បានបោះទុនវិនិយោគ និងសាងសង់អគារខ្ពស់ៗ នៅខេត្តជាប់មាត់សមុទ្រមួយនេះ។ សម្តេច ហ៊ុន សែន បានបញ្ជាក់ថា ៖ «ក្រោយពេលរបបប៉ុលពតដួលរលំទៅ ខេត្តព្រះសីហនុវាកម្សត់ ពុំមានអ្វីប្រើប្រាស់នោះទេ។ ប៉ុន្តែថ្ងៃនេះខេត្តព្រះសីហនុបានប្តូរមុខមាត់យ៉ាងធំ ដែលអគារកម្ពស់រាប់សិបជាន់ បានកើតយ៉ាងច្រើននៅក្នុងទីក្រុងមួយនេះ វាស័ក្ដិសមជាមួយនឹងការដែលយើងត្រូវធ្វើហេដ្ឋារចនាសម្ព័ន្ធឱ្យបានរឹងមាំ»។
លោក ជា សុផារ៉ា រដ្ឋមន្ត្រីក្រសួងរៀបចំដែនដី
បើតាមលោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ការស្ថាបនាហេដ្ឋារចនាសម្ព័ន្ធផ្លូវ៣៧ខ្សែនៅខេត្តព្រះសីហនុ គឺដើម្បីកែលម្អផ្លូវមេ យុទ្ធសាស្ត្រនៃប្រព័ន្ធនគរូបនីយកម្ម គមនាគមន៍ ដឹកជញ្ជូនសេដ្ឋកិច្ច ធុរកិច្ច និងទេសចរណ៍នៅខេត្តព្រះសីហនុ ដែលសំដៅក្នុងការរួមចំណែកកាត់បន្ថយភាពក្រីក្រ លើកកម្ពស់កម្រិតជីវភាពរស់នៅរបស់ប្រជាពលរដ្ឋ និងសោភណភាពរបស់ខេត្ត។
លោក ជា សុផារ៉ា បញ្ជាក់ថា៖ «ការស្ថាបនាផ្លូវនេះបានចូលរួមចំណែកដ៏ធំធេងនៅក្នុងការសម្រេចចក្ខុវិស័យរបស់រាជរដ្ឋាភិបាល ដែលបានកំណត់នៅក្នុងផែនការរាជរដ្ឋាភិបាលរៀបចំដីក្នុងខេត្តព្រះសីហនុ ចក្ខុវិស័យឆ្នាំ ២០៣០ សំដៅអភិវឌ្ឍខេត្តព្រះសីហនុ ដែលជាប៉ូលអភិវឌ្ឍន៍ជាតិ ប្រកបទៅដោយចីរភាពនៅតំបន់ឆ្នេរសមុទ្រកម្ពុជា ឱ្យក្លាយទៅជាតំបន់សេដ្ឋកិច្ចគំរូពហុបំណង មជ្ឈមណ្ឌលកំណើនជាតិ តាមរយៈការអភិវឌ្ឍទីក្រុងឆ្លាត និងការធ្វើសមាហរ័ណកម្មតាមតំបន់ឆ្នេរសមុទ្រកម្ពុជា»។
ជាមួយគ្នានេះខេត្តព្រះសីហនុ ក៏កំពុងសាងសង់ស្ថានីយដ្ឋានប្រព្រឹត្តកម្មទឹកកង្វក់ទីបី ដែលមានសមត្ថភាពសម្អាតទឹកកង្វក់ បានរហូត២ម៉ឺនម៉ែត្រគូបក្នុងមួយថ្ងៃ។ នាពេលអនាគតដ៏ខ្លី ខេត្តព្រះសីហនុនឹងមានផ្លូវល្បឿនលឿនទៅរាជធានីភ្នំពេញនៅចុងឆ្នាំ២០២២ និងមានចំណតកុងតឺន័រថ្មី មានប្រវែង៣៥០ម៉ែត្រនិងជម្រៅទឹក១៤,៥ម៉ែត្រ នៅដើមឆ្នាំ២០២៥ ដែលការអភិវឌ្ឍន៍ពីវិស័យឯកជន និងសាធារណៈនេះ ធ្វើឱ្យខេត្តមួយនេះ កាន់តែមានសក្កានុពលខ្លាំងលើផ្នែកសេដ្ឋកិច្ច។ នេះបើតាមលោក គួច ចំរើន អភិបាលខេត្តព្រះសីហនុ។
លោក គួច ចំរើន អភិបាលខេត្តព្រះសីហនុ ក្នុងសន្នីសិទកាសែត កាលពីថ្ងៃទី២៩វិច្ឆិកា ឆ្នាំ២០២១។
ថ្លែងក្នុងសន្នីសិទសារព័ត៌មាន កាលពីថ្ងៃទី២៩ វិច្ឆិកា ឆ្នាំ២០២១ លោក គួច ចំរើន បានអះអាងថា ការធ្វើទំនើបកម្មប្រមាណ៥ឆ្នាំចុងនៅក្នុងខេត្តព្រះសីហនុ គឺបានធ្វើឱ្យខេត្តនេះក្លាយជាខេត្តទំនើបមួយ ដោយកំពុងបោះជំហានទៅមុខនៅក្នុងទិសដៅ ដែលរដ្ឋាភិបាលកំណត់ទៅជាតំបន់សេដ្ឋកិច្ចពិសេសពហុបំណង។
ព្រះសីហនុ ជាខេត្តដែលសំបូរទៅដោយធនធានធម្មជាតិដ៏សម្បូរបែបដែលគ្រប់ដណ្តប់លើផ្ទៃដី ២ ៦៥៩គីឡូម៉ែត្រក្រឡា ដែល២ភាគ៣ជាដីភ្នំនិងខ្ពង់រាប។ ខេត្តនេះមានកោះធំ-តូចចំនួន៣២ និងឆ្នេរសមុទ្រមានប្រវែង១៧៥,៨១គីឡូម៉ែត្រ។ បើតាមលោក គួច ចំរើន ខេត្តព្រះសីហនុមានសក្កានុពលខ្ពស់ ក្នុងការចូលរួមអភិវឌ្ឍសេដ្ឋកិច្ច ដែលមានវិស័យសំណង់ អចលនទ្រព្យ ឧស្សាហកម្ម ពាណិជ្ជកម្ម ទេសចរណ៍ កសិឧស្សាហកម្ម និងមានកំពង់ផែទឹកជ្រៅជាងគេ នៅកម្ពុជា។ លោក បាននិយាយថា ខេត្តព្រះសីហនុ មានអត្រាកំណើនសេដ្ឋកិច្ច៦,៨ភាគរយ និងចំណូលជាមធ្យម៤៣៧៨ដុល្លារក្នុងម្នាក់(GDP)ក្នុងឆ្នាំ២០២០ ដោយបានកាត់បន្ថយអត្រាភាពក្រីក្រឱ្យធ្លាក់មកត្រឹមនៅត្រឹម ២,៦៨ភាគរយ នៅដើមឆ្នាំ២០២១។
កាលពីថ្ងៃ១៨តុលា ឆ្នាំ២០២១ វិទ្យាស្ថានផែនការ និង គំនូសប្លង់ទីក្រុង របស់ខេត្តស៊ិនជិន (Urban Planning and Design Institute of Shenzhen-UPDIS) បានចុះហត្ថលេខាជាមួយ ក្រសួងសេដ្ឋកិច្ច និងហិរញ្ញវត្ថុ លើកិច្ចសន្យាផ្តល់សេវាកម្មរៀបចំផែនការមេ ដើម្បីអភិវឌ្ឍខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណង តាមប្រព័ន្ធអនឡាញ(Zoom) ក្រោមអធិបតីភាពរបស់លោក អូន ព័ន្ធមុនីរ័ត្ន។
ទិដ្ឋភាពរួមនៃឆ្នេរសមុទ្រ ក្រុងព្រះសីហនុ
បើតាមលោក អូន ព័ន្ធមុនីរ័ត្ន គោលដៅនៃការរៀបចំផែនការមេសម្រាប់អភិវឌ្ឍខេត្តព្រះសីហនុ ឱ្យទៅជាតំបន់សេដ្ឋកិច្ចពិសេសគំរូពហុបំណងនេះ គឺដើម្បីទាញយកសក្កានុពលអភិវឌ្ឍ ឱ្យស្របទៅនឹងការផ្លាស់ប្តូររចនាសម្ព័ន្ធសេដ្ឋកិច្ចក្នុងស្រុក។ ជាពិសេសចាប់យកកាលានុវត្តភាពថ្មីៗ និងការទាក់ទាញបន្ថែមនូវការវិនិយោគ ធុរកិច្ច ដែលកើតពីការផ្លាស់ប្តូរខ្សែច្រវ៉ាក់ផ្គត់ផ្គង់នៅក្នុងតំបន់ចូលមកកម្ពុជា ក្រោយវិបត្តិនៃជំងឺកូវីដ-១៩ ដោយសំដៅពន្លឿនការអភិវឌ្ឍវិស័យឧស្សាហកម្ម វិស័យកសិកម្ម និងវិស័យសេវាកម្ម ប្រកបដោយចីរភាព និងភាពធន់។
រដ្ឋមន្ត្រីក្រសួងសេដ្ឋកិច្ចរូបនេះ បានបញ្ជាក់ បច្ចុប្បន្នកម្ពុជាបានកំណត់ចក្ខុវិស័យប្រែក្លាយខេត្តព្រះសីហនុនេះឱ្យជាប៉ូលសេដ្ឋកិច្ចដ៏សំខាន់មួយ ក្នុងការទាក់ទាញនិងស្រូបយកការវិនិយោគពីបរទេស ដែលអាចឈានក្លាយទៅជាក្បាលម៉ាស៊ីនមួយថ្មី សម្រាប់ជំរុញកំណើនសេដ្ឋកិច្ចជាតិឱ្យរីកលូតលាស់ទៅមុខឥតឈប់ឈរ។ ជាពិសេសប្រែក្លាយកម្ពុជា ឱ្យទៅជាប្រទេសចំណូលមធ្យមកម្រិតខ្ពស់នៅឆ្នាំ២០៣០ និងចំណូលខ្ពស់នៅឆ្នាំ២០៥០៕
អត្ថបទទាក់ទង
© រក្សាសិទ្ធិដោយ thmeythmey.com
