ជាតិ
រដ្ឋាភិបាលសម្រេចបង្កើនទំហំដីដែនជម្រកសត្វព្រៃ៣តំបន់ បន្ថែមទៀត ដំរី ក្នុងដែនជម្រកសត្វព្រៃគូលែន-ព្រហ្មទេព។
× ភ្នំពេញ៖ រដ្ឋាភិបាលសម្រេចពង្រីកទំហំផ្ទៃដី ជាង២ម៉ឺនហិកតាក្នុងតំបន់នីមួយ មានដែនជម្រកសត្វព្រៃភ្នំសំកុស ជម្រកសត្វព្រៃគូលែន-ព្រហ្មទេព និងដែនជម្រកសត្វព្រៃបឹងពែរ។
ការសម្រេច បង្កើនទំហំផ្ទៃដីនៅតំបន់ដែនជម្រកសត្វព្រៃជាបន្តបន្ទាប់នេះ ដោយសាររដ្ឋាភិបាល មានបំណងថែរក្សានិងការពារសោភ័ណភាពធម្មជាតិ ឬទេសភាព ប្រព័ន្ធអេកូឡូស៊ី និងជីវចម្រុះ។ លើសពីនេះ ជំរុញការអភិវឌ្ឍសេដ្ឋកិច្ច សហគមន៍មូលដ្ឋាន រួមទាំងការលើកកម្ពស់ការអប់រំ ការសិក្សាស្រាវជ្រាវ ក្នុងតំបន់នោះ។ រដ្ឋាភិបាលបញ្ជាក់បែបនេះ ក្នុងអនុក្រឹត្យដែលបានសម្រេចកែប្រែផ្ទៃដីនីមួយៗ។
ដែនជម្រកសត្វព្រៃភ្នំសំកុស ត្រូវរដ្ឋាភិបាលបន្ថែមទំហំ២៨ ៦៣៤ហិកតា គឺ ពី៣៣៣៧៥០ហិកតា ទៅដល់៣៦២៣៨៤ហិកតា។ តំបន់នេះ ស្ថិតក្នុង ភូមិសាស្ត្រខេត្តពោធិ៍សាត់ ខេត្តបាត់ដំបង និងខេត្តកោះកុង។ នេះបើតាមអនុក្រឹត្យ ស្ដីពីការកែប្រែដែនជម្រកសត្វព្រៃភ្នំសំកុស។
ចំណែកជម្រកសត្វព្រៃគូលែន-ព្រហ្មទេព ត្រូវរដ្ឋាភិបាលសម្រេចបញ្ចូលដីទំហំ២៦ ៣៩៧ហិកតាបន្ថែមទៀត ពី៤០២៥០០ហិកតា ទៅ៤២៨៩៧១ហិកតា។ តំបន់ដែនជម្រកសត្វព្រៃគូលែន-ព្រហ្មទេព គឺស្ថិតក្នុង ភូមិសាស្ត្រខេត្តសៀមរាប ខេត្តព្រះវិហារ និងខេត្តឧត្តរមានជ័យ។ យោងតាម អនុក្រឹត្យ ស្ដីពី ការកែប្រែដែនជម្រកសត្វព្រៃគូលែន-ព្រហ្មទេព។
រីឯ ដែនជម្រកសត្វព្រៃបឹងពែរ ត្រូវរដ្ឋាភិបាលសម្រេចបន្ថែមផ្ទៃដីទំហំ២៣ ៣៨៣ហិកតាបញ្ចូលបន្ថែមទៀត គឺពីផ្ទៃដីទំហំ២៤២ ៥០០ហិកតា កែប្រែទៅ២៦៥ ៨៨៣ហិកតាវិញ។ តំបន់ដែនជម្រកសត្វព្រៃបឹងពែរនេះ មានភូមិសាស្ត្រក្នុងខេត្តសៀមរាប ខេត្តព្រះវិហារ និងខេត្តកំពង់ធំ។ នេះបើតាមអនុក្រឹត្យ ស្ដីពី ការកែប្រែដែនជម្រកសត្វព្រៃបឹងពែរ។
សូមជម្រាបថា កាលពីពេលថ្មីៗនេះ ឧទ្យាជាតិព្រះមុនីវង្ស«បូកគោ» ក៏ត្រូវបានរដ្ឋាភិបាលកែពីទំហំ១៥៤ ៤៥៨ហិកតា ទៅ១៥៦ ១១៦ហិកតាដែរ៕
© រក្សាសិទ្ធិដោយ thmeythmey.com