ទឹកដោះម្តាយ សម្បូរទៅដោយអង់ទីករ(អង្គបដិបក្ខ) និងសារធាតុចិញ្ចឹម សម្រាប់ទប់ទល់ ឬប្រឆាំងនឹងមេរោគទាំងឡាយ ព្រមទាំងជំងឺផ្សេងៗ។ លើសពីនេះ ទឹកដោះអ្នកម្តាយស្អាត ហើយមានកម្រិតកម្តៅត្រឹមត្រូវ ដែលអាចជួយទប់ស្កាត់ការរាគរូស និងបញ្ហាផ្លូវដង្ហើម។ ម្យ៉ាងវិញទៀត ការបំបៅកូនដោយទឹកដោះម្តាយ ជួយកាត់បន្ថយការចំណាយលើថ្លៃទឹកដោះគោម្សៅ។ ជាពិសេសជួយឱ្យម្ដាយ និងកូនកាន់តែមានមនោសញ្ចេតនា ស្រឡាញ់គ្នាកាន់តែខ្លាំងផងដែរ។

អ្នកម្ដាយដែលមានកូនដំបូងរូបនេះ អធិប្បាយពីមនោសញ្ចេតនាដូច្នេះ៖«ខ្ញុំមានមោទកភាព និងមោទកភាពណាស់ ដែលខ្ញុំមានទឹកដោះឱ្យកូន ព្រោះវាជាអំណោយដ៏ល្អបំផុត ហើយវាចេញពីខ្លួនរបស់ខ្ញុំ ផ្ដល់ឱ្យទៅកូន។ ការបំបៅដោះកូនធ្វើឱ្យមានភាពស្និទ្ធស្នាលកើតឡើង និងមានអារម្មណ៍ផ្សារភ្ជាប់គ្នាកាន់តែខ្លាំង។ ក្នុងដំណើរជីវិតរបស់ខ្ញុំ ខ្ញុំឆ្លងកាត់ភាពជាម្ដាយ កូនខ្ចី ហើយបានបំបៅដោះកូន នោះជាលទ្ធផលសម្រេចបានក្នុងកំណត់ហេតុនៃជីវិតខ្ញុំ»។

 

បន្ទាប់ពីសម្រាកមាតុភាព អ្នកស្រី សុធី នាងសុធា បានជ្រើសរើសការបំបៅកូន និងបន្តបំបៅរហូតដល់អ្នកស្រីចូលបំពេញការងារវិញ។ បច្ចុប្បន្នអ្នកស្រី បានចំណាយពេលបូមទឹកដោះទុកឱ្យកូនស្រីរបស់អ្នកស្រីនៅកន្លែងធ្វើការ។ ជាធម្មតាឱសថការីរូបនេះ បូមទឹកដោះក្នុងការិយាល័យ ដែលមានមិត្តរួមការងារនៅក្នុងនោះ ។ អ្នកស្រី ត្រូវបូមទឹកដោះផង និងធ្វើការផង។ 

 

អ្នកស្រី សុធា រៀបរាប់ដូច្នេះ៖«ការងាររបស់ខ្ញុំមានចុះបេសកកម្មទៅតាមខេត្តឆ្ងាយៗជាច្រើនថ្ងៃ។ ខ្ញុំបូមទឹកដោះក្នុងឡានពេលកំពុងធ្វើដំណើរ។ ពេលខ្លះបូមនៅតាមមណ្ឌលសុខភាពដែលខ្ញុំអភិបាល ហើយនៅស្ថានីយប្រេងឥន្ធនៈក៏មាន។ ខ្ញុំចាំបាច់ត្រូវបូមទឹកដោះបង្កកទុកសម្រាប់កូន»។
 

ការឈប់សម្រាកមាតុភាពមានប្រាក់ឈ្នួលនៅកម្ពុជា មានត្រឹមតែ៩០ថ្ងៃប៉ុណ្ណោះ។ រយៈពេលនេះ ខ្លីជាងការណែនាំអប្បបរមារបស់អង្គការពលកម្មអន្តរជាតិ ILO ដែលមានរយៈពេល ១៨ សប្តាហ៍ (១២៦ថ្ងៃ)។ បើតាមរបាយការណ៍ កាលពីឆ្នាំ២០២២ ស្ត្រីមានចំនួន ៤៧.១ ភាគរយនៃកម្លាំងពលកម្មសរុបនៅក្នុងប្រទេសកម្ពុជា។

 

អង្គការយូនីសេហ្វ មើលឃើញថា ភាពវិជ្ជមានក្នុងអាជីវកម្មថយចុះ ដែលបង្ហាញពីកង្វះការយកចិត្តទុកដាក់ចំពោះសុខភាពរបស់ស្ត្រី ដែលបំពេញការងារឱ្យក្រុមហ៊ុនពួកគេ។ បើតាមយូនីសេហ្វ កង្វះការគាំទ្រនៅកន្លែងការងារនេះ ជាពិសេសបញ្ហាទាក់ទងនឹងមាតុភាព បានបណ្តាលឱ្យស្រ្តីអវត្តមានពីកន្លែងធ្វើការពី៣០ ទៅ៧០ ភាគរយ។ មួយវិញទៀត ការថយចុះចំនួនបុគ្គលិកជាស្ត្រី តាមអង្គភាពការងារនេះ ដោយសារតែស្ត្រីទាំងនោះ មានអារម្មណ៍ថា ខ្វះការគាំទ្រគ្រប់គ្រាន់ពីក្រុមហ៊ុន ជាពិសេសលើបញ្ហាមាតុភាពនេះ។ វាជាដើមចមនៃការលាឈប់របស់បុគ្គលិកស្ត្រីកាន់តែខ្ពស់ ដែលនាំឱ្យមានការកើនឡើងលើការចំណាយស្វែងរក និងការបណ្តុះបណ្តាលបុគ្គលិកថ្មីៗ សម្រាប់ក្រុមហ៊ុន។