ប្រធានមូលនិធិ Nippon រូបនេះ បានកោតសរសើរកម្ពុជា ដែលបានប្រែក្លាយខ្លួន ពីប្រទេសរងគ្រោះខ្ទេចខ្ទាំដោយសារភ្នក់ភ្លើងសង្គ្រាម មកជាប្រទេសកំពុងអភិវឌ្ឍរីកចម្រើនលើគ្រប់វិស័យ។ តាមរយៈសំណេរលើហ្វេសប៊ុកសម្ដេច ហ៊ុន ម៉ាណែត បានស្រង់សម្តីលោក យ៉ូហេ សាសាកាវ៉ា យ៉ាងដូច្នេះថា ៖ «កម្ពុជា គឺជាគំរូដ៏ល្អមួយនៃការដឹកនាំប្រទេសប្រកបដោយសុខសន្តិភាព និងឯកភាពជាតិ សម្រាប់បណ្តាប្រទេសផ្សេងទៀតលើសាកលលោកអាចយកជាគំរូ ខណៈដែលប្រទេសមួយចំនួនកំពុងតែរងនូវជម្លោះបែកបាក់ និងអសន្តិសុខ» ។

 

ចាប់ពីឆ្នាំ១៩៩២ មូលនិធិ The Nippon Foundation បានផ្តល់ជំនួយមនុស្សធម៌ដល់កម្ពុជា នៅក្នុងវិស័យអប់រំ និងសុខាភិបាល ។ ក្នុងនោះប្រជាជនកម្ពុជាជាច្រើន បានទទួលអត្ថប្រយោជន៍ពីជំនួយទាំងនោះ ដូចជា ការទទួលបានអវយវៈសិប្បនិម្មិត ដែលផ្តល់លទ្ធភាពឱ្យពួកគេមានឱកាសត្រឡប់ទៅប្រកបរបរចិញ្ចឹមជីវិតក្នុងជីវភាពប្រក្រតីឡើងវិញ ។ នេះជាការលើកឡើងរបស់សម្ដេច ហ៊ុន ម៉ាណែត ដែលបានបន្ថែមថា រដ្ឋាភិបាលកម្ពុជា នឹងបន្តគាំទ្រចំពោះគម្រោងសកម្មភាពនានា ដែលមូលនិធិ The Nippon Foundation បន្តអនុវត្តនៅកម្ពុជា ។
 

ក្នុងជំនួបដោយឡែកជាមួយសម្ដេច ហ៊ុន សែន វិញ លោក យូហេ សាសាកាវ៉ា បានលើកឡើងពីវិបត្តិនៅមីយ៉ាន់ម៉ា មកជជែកពិភាក្សាគ្នា។ លោក យូហេ សាសាកាវ៉ា និងសម្ដេច ក៏បានឯកភាពបំពេញទស្សនកិច្ចរួមគ្នា ទៅកាន់ប្រទេសមីយ៉ាន់ម៉ាដែរ។ ប្រធាន Nippon Foundation រូបនេះ នៅតែចាត់ទុកសម្តេច ហ៊ុន សែន ជាតួអង្គសំខាន់ក្នុងការជួយដោះស្រាយបញ្ហាមីយ៉ាន់ម៉ា ឱ្យមានភាពល្អប្រសើរឡើងវិញ តាមរយៈបទពិសោធន៍នៃការដឹកនាំកម្ពុជាកន្លងមក។