នាឡិកាជាប់ក្នុងទូឈើ ផលិតអំឡុងឆ្នាំ១៩៥០

ជាតិ

វីដេអូ

នាឡិកាជាប់ក្នុងទូឈើ ផលិតអំឡុងឆ្នាំ១៩៥០

29, Dec 2023 , 9:10 am

រូបភាព

ដោយ: នាយយ៉ាន

សៀមរាប៖ ក្នុងចំណោមនាឡិកាបុរាណជាច្រើនគ្រឿងដែលដាក់តាំងនៅសារមន្ទីរ វិមានសុខា នៅក្រុងសៀមរាប មាននាឡិកាជាប់ក្នុងទូមួយគ្រឿង ម៉ាក EMPEROR ដែលផលិតក្នុងទស្សវត្សរ៍ ១៩៥០ នៅប្រទេសស្វីស។ តាមទីផ្សារ នាឡិកាបុរាណប្រភេទនេះ បើស្អាតដូចដើម មានតម្លៃជាង ២៦៥០អឺរ៉ូ។ លោក លី ប៉េងហេង ដែលជាស្ថាបនិកសារមន្ទីរវិមានសុខា ជាប្រចាំតែងតែដំឡើងស៊ីឡាំងធ្ងន់ដែលធ្វើឱ្យនាឡិកានេះដើរ ព្រោះវាប្រើកម្លាំងទម្ងន់ មិនប្រើអគ្គិសនីទេ។

ដើម្បីជ្រាបច្បាស់ សូមអញ្ជើញលោកអ្នកនាងទស្សនាវីដេអូខាងក្រោមនេះ៖

សម្រាប់ស៊ីឡាំងទាំង៣ គាត់ប្រើម៉ានីវែលមួយ បង្វិលរហូតដល់ស៊ីឡាំងឡើងលើទាំងអស់ហើយ។ នាឡិកាកញ្ចាស់នេះ វាធ្វើអំពីលោហធាតុពណ៌ប្រាក់ និងពណ៌មាស រលោងនិងគ្រើម ដែលបង្ហាញរង្វាស់ម៉ោង និងនាទី ហើយក៏មានរង្វង់មួយទៀតសម្រាប់វិនាទី។ នៅផ្នែកខាងលើ ក៏បង្ហាញថ្ងៃដែរ ប៉ុន្តែពីថ្ងៃទី១ ដល់ថ្ងៃទី២៩ប៉ុណ្ណោះ ដែលល្មមសម្រាប់តែខែកុម្ភៈ។ នាឡិកាក្នុងទូនេះ មានកម្ពស់ជាងពីរម៉ែត្រ បណ្ដោយជិតកន្លះម៉ែត្រ និងទទឺងប្រហែល៣០សង់ទីម៉ែត្រ។ អ្វីដែលគួរចាប់អារម្មណ៍ គឺវាបន្លឺសូរសំឡេងពីរោះ រៀងរាល់១៥នាទី! មានមេឡូឌីមួយ សម្រាប់១៥នាទី និង៤៥នាទី។ មានមេឡូឌីមួយ សម្រាប់៣០នាទី។ ហើយក៏មានវាយកណ្ដឹងតាមចំនួនម៉ោង ពីម៉ោង១ ទៅម៉ោង១២ដែរ។ នាឡិកាអឺរ៉ុបនេះ មានឧបករណ៍ភ្លេងខាងក្នុង។ គឺជាកណ្ដឹងទំហំផ្សេងៗ គ្រប់ណូត។

ម៉ាក EMPEROR ត្រូវបានបង្កើតឡើង ដោយក្រុមហ៊ុន BRANDT Louis & frère S.A.។ លោក BRANDT Louis បានចាប់ផ្ដើមផលិតនាឡិកាឆ្នាំ១៨៤៨ នៅទីក្រុង Bienne ប្រទេសស្វីស។

ស្វីស គឺជាប្រទេសដែលប៉ិនប្រសប់ និងល្បីល្បាញលើការផលិតនាឡិកា ហើយកាលពីបុរាណ គេប្រើនាឡិកាដែលបង្ហាញម៉ោងតាមចលនាព្រះអាទិត្យ។ ចាប់ពីសតវត្សរ៍ទី១៤ ជនជាតិអឺរ៉ុប ផ្ដើមធ្វើនាឡិកាធំៗ ដែលដើរតាមប្រព័ន្ធមេកានិក មុនគេបង្អស់។ វាមិនច្បាស់ថា ចាប់ផ្ដើមមុននៅប្រទេសបារាំង នៅប្រទេសអាល្លឺម៉ង់ ឬនៅប្រទេសស្វីស ក៏ប៉ុន្តែប្រាកដថា ត្រូវបានចាប់ផ្ដើមនៅតំបន់ភ្នំនោះ ដែលស្ថិតនៅជិតព្រមដែន៣ប្រទេសនោះជាប់គ្នា។ រហូតដល់សម័យឥឡូវនេះក៏តំបន់នោះ មានក្រុមហ៊ុនផលិតនាឡិកាគ្រប់មុខជាច្រើនណាស់ ជាពិសេសនាឡិកាគុណភាពខ្ពស់។ តាំងពីនោះមក ស្វីសមានឯកទេសខាងឧស្សាហកម្មមេកានិកលម្អិត។

សារមន្ទីរ វិមានសុខា មានតាំងវត្ថុបុរាណជាច្រើនប្រភេទ ពិសេសយានជំនិះបុរាណ ឧបករណ៍សោតទស្សបុរាណ នាឡិកាបុរាណ និងវត្ថុបុរាណផ្សេងៗទៀត។ ទីតាំងនេះ បើករៀងរាល់ថ្ងៃ ពីម៉ោង៨ព្រឹក ដល់ម៉ោង៥ល្ងាច។ វាស្ថិតនៅផ្លូវលេខ២២ ភូមិត្រពាំងសេះ សង្កាត់គោកចក ក្រុងសៀមរាប ខេត្តសៀមរាប។ សំបុត្រចូលមានតម្លៃ ៥០០០រៀល សម្រាប់ពលរដ្ឋខ្មែរម្នាក់ និង២០ ០០០រៀល សម្រាប់ពលរដ្ឋបរទេសម្នាក់។ សូមបញ្ជាក់ថា ក្នុងសារមន្ទីរ ក៏មានហាងកាហ្វេតុបតែងជាមួយវត្ថុបុរាណច្រើនដែរ៕