ជាតិ
នយោបាយជាតិ
រុស្ស៊ី សន្យាផ្ដល់ជំនួយសម្រាប់ការបោះឆ្នោត ខណៈNGO ស្នើឲ្យមានដំណោះស្រាយនយោបាយសិន ជំនួបពិភាក្សារវាងសម្តេចនាយករដ្ឋមន្ត្រី ហ៊ុន សែន និងនាយករដ្ឋមន្រ្តីរុស្ស៊ី លោក ឌីមេទ្រី ម៉ាក់ម៉េដេវ
× ភ្នំពេញ៖ រដ្ឋាភិបាលរុស្ស៊ី សន្យាផ្ដល់ជំនួយដល់ប្រទេសកម្ពុជា សម្រាប់ប្រើប្រាស់ក្នុងដំណើការបោះឆ្នោតជ្រើសតាំងតំណាងរាស្ត្រនៅឆ្នាំ២០១៨ខាងមុខ។ នាយករដ្ឋមន្ត្រីរុស្ស៊ី បានសន្យាផ្ដល់ជំនួយនេះ ក្នុងជំនួបទ្វេរភាគីជាមួយនាយករដ្ឋមន្ត្រី ហ៊ុន សែន ក្រោយកិច្ចប្រជុំអាស៊ានលើកទី៣១ និងកិច្ចប្រជុំអាស៊ានពាក់ព័ន្ធ នៅទីក្រុងម៉ានីល ប្រទេសហ្វីលីពីន កាលពីថ្ងៃទី១២ វិច្ចិកា។
ក្នុងជំនួបពិភាក្សាគ្នានេះនាយករដ្ឋមន្ត្រីរុស្ស៊ី លោក ឌីមេទ្រី ម៉ាក់ម៉េដេវ បាននិយាយប្រាប់សម្ដេច ហ៊ុន សែន ថា រុស្សីនឹងផ្តល់ជំនួយសម្រាប់ការបោះឆ្នោតសកលឆ្នាំ២០១៨ និងត្រៀមបញ្ជូនអ្នកសង្កេតការណ៍បោះឆ្នោតមកត្រួតពិនិត្យដំណើរការបោះឆ្នោតនេះផងដែរ។ ការសន្យារបស់នាយករដ្ឋមន្ត្រីរុស្ស៊ី បន្ទាប់ពីឃើញគោលនយោបាយរដ្ឋាភិបាលកម្ពុជាដែលបន្តស្ថេរភាពនយោបាយ ដោយមិនអាចឲ្យមានបរទេសណាចូលជ្រៀតជ្រែកបានឡើយ។ នេះបើតាមការសំណេរលើហ្វេសប៊ុកនាយករដ្ឋមន្ត្រី ហ៊ុន សែន។
អ្នកនាំពាក្យគណៈកម្មាធិការជាតិរៀបចំការបោះឆ្នោត(គ.ជ.ប) លោក ហង្ស ពុទ្ធា ស្វាគមន៍ចំពោះជំនួយរបស់រុស្ស៊ី ដែលគ្រោងជួយដល់ដំណើការបោះឆ្នោតនៅកម្ពុជានេះ។ លោក ហង្ស ពុទ្ធា ចាត់ទុកជំនួយបន្ថែមពីបរទេសនេះ នឹងជួយដំណើរការបោះឆ្នោតនៅកម្ពុជា ឲ្យកាន់តែប្រសើរឡើងថែមទៀត។
ថ្លែងប្រាប់សារព័ត៌មានថ្មីៗ អ្នកនាំពាក្យគ.ជ.ប រូបនេះបានអត្ថាធិប្បាយយ៉ាងដូច្នេះថា៖«យើងជាស្ថាប័នមួយដែលទទួលការសហការពីគ្រប់ភាគីទាំងអស់ ឲ្យតែការផ្ដល់ជំនួយនោះមានគោលបំណងល្អ និងមានឆន្ទៈតាមច្បាប់បោះឆ្នោតនៅកម្ពុជា។ ហើយការផ្ដល់ជំនួយពីរុស្ស៊ីនេះវាក៏ជារឿងល្អមួយ ដែលអាចជួយដល់ដំណើការបោះឆ្នោតឲ្យកាន់តែប្រសើរឡើង ព្រោះយើងក៏ត្រូវការបទពិសោធន៍ តាមរយៈការសហការពីប្រទេសទាំងនោះ ដើម្បីឲ្យដំណើការបោះឆ្នោតប្រព្រឹត្តទៅបានល្អ»។
បើតាមលោក ហង្ស ពុទ្ធា អ្វីដែលគ.ជ.ប ត្រូវការជំនួយពីរុស្ស៊ី សម្រាប់ដំណើការបោះឆ្នោតនេះ គឺជាកញ្ចប់ថវិកាក្នុងខ្ទង់ចំណាយណាមួយ ដើម្បីយកមកប្រើប្រាស់ក្នុងការទិញសម្ភារៈ ប្រតិបត្តិការអប់រំ ឬផ្សព្វផ្សាយនានាជាដើម។
ទាក់ទងនឹងជំនួយពីរុស្ស៊ី ដែលគ្រោងផ្ដល់ជូនរដ្ឋាភិបាលកម្ពុជានេះ ត្រូវបាននាយកប្រតិបត្តិអង្គការនិចហ្វិច ដែលធ្វើកិច្ចការងារលើដំណើការបោះឆ្នោតចាត់ទុកជារឿងល្អ សម្រាប់ការបោះឆ្នោតនៅកម្ពុជា។ ប៉ុន្តែអ្វីដែលលោក សំ គន្ធាមី ផ្ដល់យោបល់នោះ គឺរដ្ឋាភិបាលត្រូវរកដំណោះស្រាយនយោបាយណាមួយឲ្យបានត្រឹមត្រូវ សម្រាប់ឲ្យគណបក្សដទៃទៀត មានសិទ្ធធ្វើនយោបាយស្មើគ្នា ដើម្បីផ្ដល់ទំនុកចិត្តដល់ម្ចាស់ជំនួយផងដែរ។
«រដ្ឋាភិបាលត្រូវធ្វើយ៉ាងណារក្សាស្ថេរភាពនយោបាយឲ្យបានស្ងប់ស្ងាត់ សម្រាប់ផ្ដល់ទំនុកចិត្តដល់ប្រជាពលរដ្ឋ ឲ្យពួកគេចូលរួមការបោះឆ្នោតកុំឲ្យមានការភ័យខ្លាច។ ហើយត្រូវផ្ដល់ឲ្យឱកាសឲ្យអ្នកនយោបាយ មានសកម្មភាព និងសិទ្ធិធ្វើនយោបាយស្មើគ្នាមុនការបោះឆ្នោត។ ហើយនៅពេលបោះឆ្នោត ត្រូវមានការរក្សាសន្តិសុខ សណ្ដាប់ធ្នាប់ជាដើម ដែលរដ្ឋាភិបាលត្រូវធ្វើ»។នេះបើតាមនាយកប្រតិបត្តិអង្គការនិចហ្វិចរូបនេះ ។
ប៉ុន្តែអ្វីដែលគួរឲ្យកត់សម្គាល់នោះ ស្របពេលរដ្ឋាភិបាលរុស្ស៊ី សន្យាផ្ដល់ជំនួយដល់ប្រទេសកម្ពុជា សម្រាប់ប្រើប្រាស់ក្នុងដំណើការបោះឆ្នោតជ្រើសតាំងតំណាងរាស្ត្រនៅឆ្នាំ២០១៨ខាងមុខ ក៏មានការព្រមានមិនទទួលស្គាល់ការបោះឆ្នោតនៅកម្ពុជាពីសំណាក់សមាជិកព្រឹទ្ធសភាអាមរិកផងដែរ។ សមាជិកព្រឹទ្ធសភាលោក ថេត គ្រូស ព្រមានថា បើមិនដោះលែងប្រធានគណបក្សប្រឆាំងឯកឧត្តម កឹម សុខា និងមិនទម្លាក់បណ្ដឹងរំលាយគណបក្សប្រឆាំងទេ នោះអាមេរិក និងសម្ព័ន្ធមិត្តខ្លួន មិនទទួលស្គាល់ការបោះឆ្នោតនៅកម្ពុជាឡើយ។
តែយ៉ាងណាសម្ដេចនាយករដ្ឋមន្ត្រី ហ៊ុន សែន ហាក់មិនខ្វល់ពីបរទេស ដែលមិនចង់ទទួលស្គាល់ការបោះឆ្នោតនៅកម្ពុជា ដោយសារតែបញ្ហាគណបក្សសង្គ្រោះជាតិឡើយ។ សម្ដេច ហ៊ុន សែន ធ្លាប់បាននិយាយថា បរទេសទទួលស្គាល់ ឬមិនទទួលស្គាល់មិនសំខាន់នោះទេ ប៉ុន្តែអ្វីដែលសំខាន់គឺការទទួលស្គាល់ពីប្រជាពលរដ្ឋកម្ពុជា។
រដ្ឋាភិបាល បានកំណត់ការបោះឆ្នោតជ្រើសរើសសមាជិកព្រឹទ្ធសភា នឹងប្រព្រឹត្តទៅនៅថ្ងៃទី ២៥ កុម្ភៈ ឆ្នាំ២០១៨ ។ រីឯការបោះឆ្នោតជ្រើសរើសតំណាងរាស្ត្ររដ្ឋសភា នឹងប្រព្រឹត្តទៅនៅថ្ងៃទី ២៩ កក្កដា ឆ្នាំ២០១៨។
សម្រាប់ដំណើរការបោះឆ្នោតនៅឆ្នាំ២០១៨នេះ រដ្ឋាភិបាលបានត្រៀមកញ្ចប់ថវិកា៥៣លានដុល្លារ ។ នេះបើតាមលោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត ដែលបានបន្ថែមដូច្នេះ៖«រដ្ឋាភិបាលបានត្រៀមថវិកាគ្រប់គ្រាន់សម្រាប់ការបោះឆ្នោតហើយ ប៉ុន្តែបើមានបរទេសផ្ដល់ជំនួយមក ក៏វាល្អដែរព្រោះអាចកាត់បន្ថយខ្ទង់ចំណាយរបស់រដ្ឋាភិបាលខ្លះដែរ ។ តែបើអត់ជំនួយក៏ដំណើរការបោះឆ្នោតអាចប្រព្រឹត្តទៅបានដែរ»៕
Tag:
ហ៊ុន សែន
រុស្ស៊ី
បោះឆ្នោត
គជប
© រក្សាសិទ្ធិដោយ thmeythmey.com