ជាតិ
នយោបាយជាតិ
«ភ្លើងទៀន» មិនចូលប្រជែងយកកៅអីព្រឹទ្ធសភាឆ្នាំ២០១៨ឡើយ ប្រធានគណបក្សភ្លើងទៀន លោក ទាវ វណ្ណុល
× ភ្នំពេញ៖ គណបក្ស«ភ្លើងទៀន» ដែលមានសមាជិកព្រឹទ្ធសភា១១នាក់ នឹងមិនចូលរួមឈរឈ្មោះបោះឆ្នោតជ្រើសតាំងសមាជិកព្រឹទ្ធសភា ឆ្នាំ២០១៨ខាងមុខឡើយ ដោយសារតែគ្មានសង្ឃឹមទទួលជ័យជម្នះ ក្រោយពីគណបក្សសង្គ្រោះជាតិត្រូវបានតុលាការរំលាយ។
ដើមចមនៃការរំលាយគណបក្សសង្គ្រោះជាតិ បានជំរុញឲ្យគណបក្ស«ភ្លើងទៀន» ដែលបានប្តូរឈ្មោះពីគណបក្ស«សមរង្ស៊ី» បោះបង់ការប្រកួតប្រជែងបោះឆ្នោតជ្រើសតាំងសមាជិកព្រឹទ្ធសភាខាងមុខនេះ។ ប្រធានគណបក្សភ្លើងទៀន លោក ទាវ វណ្ណុល បាននិយាយថា មូលហេតុដែលគណបក្សលោក មិនឈរឈ្មោះបោះឆ្នោតជ្រើសតាំងសមាជិកព្រឹទ្ធសភានេះ ព្រោះតែគ្មានសង្ឃឹមទទួលបានកៅអីឡើយ។
ថ្លែងប្រាប់សារព័ត៌មានថ្មីៗ ប្រធានគណបក្សភ្លើងទៀនរូបនេះ បានពន្យល់ដូច្នេះថា៖«គណបក្សភ្លើងទៀន យើងគឺសង្ឃឹមលើអង្គបោះឆ្នោតក្រុមប្រឹក្សារាជធានី ខេត្ត ក្រុង ស្រុក ខណ្ឌ ឃុំ សង្កាត់ ទាំង៥០០៧នាក់ របស់គណបក្សសង្គ្រោះជាតិ ដែលមានការរួមបញ្ចូលគ្នារវាងគណបក្សសម រង្ស៊ី និងគណបក្សសិទ្ធិមនុស្ស ។ ដូច្នេះបើគណបក្សសង្គ្រោះជាតិត្រូវបានរំលាយបែបនេះហើយ យើងក៏មានអាចសង្ឃឹមទទួលបានជ័យជម្នៈដែរ»។
ការបរិច្ឆេទនៃការចុះឈ្មោះចូលរួមបោះឆ្នោតជ្រើសតាំងសមាជិកព្រឹទ្ធសភា របស់គណបក្សនយោបាយ ត្រូវបានគណៈកម្មាធិការជាតិរៀបចំការបោះឆ្នោត ពន្យាពេលពីថ្ងៃទី២៨ ខែវិច្ឆិកា ទៅថ្ងៃទី១២ ខែធ្នូ ឆ្នាំ២០១៧ ។ គណៈកម្មាធិការជាតិរៀបចំការបោះឆ្នោត (គជប) ធ្លាប់បានលើកឡើងកន្លងមកថា មានគណបក្ស៣ប៉ុណ្ណោះ ដែលបានចុះឈ្មោះចូលរួមការបោះឆ្នោតជ្រើសតាំងសមាជិកព្រឹទ្ធសភា ក្នុងនោះមានគណបក្សប្រជាជនកម្ពុជា គណបក្សយុវជនកម្ពុជា និងគណបក្សសង្គ្រោះជាតិ ដែលត្រូវបានរំលាយ។ ហើយមានតែគណបក្សប្រជាជនទេ ដែលគ.ជ.ប ប្រកាសទទួលស្គាល់ជាផ្លូវការ។ នេះបើតាមសមាជិកគ.ជ.ប លោក ឯម សូផាត ។
ការបោះឆ្នោតជ្រើសតាំងសមាជិកព្រឹទ្ធសភា អាណត្តិទី៤ នឹងប្រព្រឹត្តទៅនៅថ្ងៃទី២៥ កុម្ភៈ ឆ្នាំ២០១៨ខាងមុខ។ បើតាមគ.ជ.ប ដំណើការបោះឆ្នោតនេះ នឹងប្រព្រឹត្តទៅធម្មតា ដោយគ្មានការរាំងស្ទះអ្វីឡើយ។
បច្ចុប្បន្ន សមាជិកព្រឹទ្ធសភាពីគណបក្សភ្លើងទៀន មានចំនួន១១រូប ហើយសមាជិកព្រឹទ្ធសភាពីគណបក្សប្រជាជនកម្ពុជា មានចំនួន៥0រូប៕
Tag:
ទាវ វណ្ណុល
ភ្លើងទៀន
© រក្សាសិទ្ធិដោយ thmeythmey.com