កីឡាជាតិ
ជាតិ
ចេសា សង្ឃឹមថាកម្ពុជាពង្រឹងកីឡាជឺជិតស៊ូសម្រាប់ឱកាសទៅប្រជែងមេដាយនៅអូឡាំពិក២០២០
× ខាន់ ចេសា (Khan Jessa) ជាកីឡាការិនីខ្មែរ-អាមេរិកទី១ ដែលបានឈ្នះមេដាយមាសពីកីឡា Jiu-Jitsu ប្រភេទទម្ងន់ក្រោម៤៩គីឡូក្រាមជូនកម្ពុជានៃព្រឹត្តិការណ៍កីឡាអាស៊ី Asian Games 2018 នៅឥណ្ឌូណេស៊ី។ នាងជឿជាក់ថាកីឡានេះនឹងកាន់តែរីកចម្រើនក្នុងប្រទេសកម្ពុជា ហើយអាចឈានជើងទៅប្រជែងមេដាយក្នុងព្រឹត្តិការណ៍កីឡាអូឡាំពិកបន្តទៀត។
ជ័យលាភីមេដាយមាសសម្រាប់កម្ពុជារបស់យុវនារីដែលកើតក្នុងរដ្ឋតិចសាស ហើយទៅរស់នៅក្នុងរដ្ឋកាលីហ្វនីញ៉ា សហរដ្ឋអាមេរិកជាយុទ្ធនាការប្រកួតប្រជែងតំណាងឲ្យប្រទេសកំណើតរបស់ឪពុកនាងជាលើកដំបូង។
ខាន់ ចេសា បានរៀបរាប់ក្នុងបទសម្ភាសន៍មួយនៅថ្ងៃទី២៦ ខែសីហាជាមួយទីភ្នាក់ងារព័ត៌មានបារាំង AP ថា៖«ខ្ញុំបានឈ្នះមេដាយមាសច្រើនណាស់ពីមុនមក ប៉ុន្តែលើកនេះពិតជាពិសេស»។
កីឡាការិនី វ័យ១៦ឆ្នាំរូបនេះបន្ថែមទៀតថា នាងបានធ្វើដំណើរទៅកាន់ប្រទេសកម្ពុជាជាលើកដំបូងមួយសប្តាហ៍មុនពិធីបើកផ្លូវការណ៍កីឡាប្រចាំតំបន់អាស៊ីក្នុងក្រុងហ្សាការតា ដើម្បីចូលរួមហ្វឹកហាត់ត្រៀមប្រជែងតំណាងឲ្យប្រទេសនេះដោយជ្រើសរើសយកប្រភេទកីឡា jiu-jitsu។
«វាពិតមានន័យណាស់ ព្រោះនេះជាលើកទីមួយដែលពួកគេមានប្រភេទកីឡា jiu-jitsu ដូច្នេះខ្ញុំរីករាយដែលខ្ញុំអាចឈ្នះវាសម្រាប់ប្រទេសកម្ពុជា និងជាអ្នកបង្កើតប្រវត្តិសាស្ត្រ»។ Khan Jessa និយាយដូច្នេះ។
ចេសា ដែលមានឪពុកជាជនជាតិខ្មែរ ម្តាយជាជនជាតិម៉ិកស៊ិក ប៉ុន្តែមិនចេះនិយាយភាសាខ្មែរសោះហើយស្គាល់តែពាក្យ«ម្ហូប»មួយមុខប៉ុណ្ណោះនោះ បានស្នើក្នុងនាមជ័យលាភីមេដាយមាសឲ្យកម្ពុជាជួយលើកកំពស់វិស័យកីឡា jiu-jitsu ឲ្យកាន់តែរីកចម្រើន ហើយនាងជឿជាក់ថាកីឡានេះនឹងអាចឈានជើងទៅប្រជែងក្នុងកីឡាអូឡាំពិកនាក្រុងតូក្យូ ឆ្នាំ២០២០។
នាងសង្ឃឹមថា កីឡានេះនឹងបន្តរីកចម្រើន ហើយប្រជាជនកម្ពុជាទាំងអស់នឹងស្គាល់ពីវាកាន់តែច្បាស់ចាប់ពីពេលនេះតទៅ។
កម្ពុជាដែលមានប្រជាជនប្រមាណជា ១៥លាននាក់បានឈ្នះមេដាយមាសជាលើកដំបូងរបស់ខ្លួនក្នុងរយៈពេល៦០ឆ្នាំពីកីឡា Asian Games នេះកាលពី ៤ឆ្នាំមុននៅទីក្រុង Incheon កូរ៉េខាងត្បូងដោយកីឡាការិនី ស៊ន សៀវម៉ី។
សម្រាប់នៅឥណ្ឌូណេស៊ីលើកទី១៨នេះ កម្ពុជារកបានកំណត់ត្រាដ៏អស្ចារ្យតាមរយៈការឈ្នះមេដាយមាស២ និងសំរឹទ្ធ១។ ក្រៅពីកីឡាការិនី ខាន់ ចេសា កីឡាករម៉ូតូទឹក (JetSki) សាលី អ៊ូមើត បានឈ្នះមេដាយមាសលើវិញ្ញាសា Ski Modified និងមេដាយសំរឹទ្ធលើវិញ្ញាសា Runabout 1100 Stock ជូនកម្ពុជាផងដែរ៕
Tag:
Asian Games
ខាន់ ចេសា
Jiu-Jitsu
ឥណ្ឌូណេស៊ី
© រក្សាសិទ្ធិដោយ thmeythmey.com