ជាតិ
សម្ដេច ហ៊ុន សែន ប្រាប់ឲ្យអភិបាលខេត្តកណ្ដាល ជួយយកចិត្តទុកដាក់គ្រួសារសពក្មេង៣នាក់ ដោយសារលិចទូក
× កណ្ដាល៖ សម្ដេចនាយករដ្ឋមន្ត្រី ហ៊ុន សែន ប្រាប់ឲ្យអភិបាលខេត្តកណ្ដាល ជួយយកចិត្តទុកដាក់លើគ្រួសារសពក្មេង៣នាក់ ដែលលិចទូក កាលពីថ្ងៃទី២៩ តុលា។
ថ្លែងក្នុងពិធីជួបសំណេះសំណាលជាមួយកម្មកររោងចក្រជាង៦ពាន់នាក់ នៅស្រុកមុខកំពូល ខេត្តកណ្ដាលព្រឹកនេះ សម្ដេច ហ៊ុន សែន ដែលចូលរួមមរណទុក្ខគ្រួសារសពនេះ បានអំពាវនាវឲ្យប្រជាពលរដ្ឋ ដែលរស់នៅតាមដងទន្លេរទាំងអស់ ប្រុងប្រយ័ត្នលើបញ្ហាខាងលើនេះ។
គួរបញ្ជាក់ថា បងប្អូនបង្កើត៣នាក់ បានបាត់ខ្លួន ក្នុងកណ្តាលទន្លេបាសាក់ ដោយសារតែការលិចទូក កាលពីថ្ងៃទី២៩ តុលា។ ហេតុការណ៍ខាងលើ បានកើតឡើងដោយបុរសឈ្មោះ រិន មករា និងមិត្តស្រី បានបបួលគ្នាជិះទូកលេងតាមដងទន្លេបាសាក់ ដោយពួកគេមិនចេះបញ្ឆេះម៉ាស៊ីនបើកបរទូក។ ភ្លាមនោះ បុរសឈ្មោះ រិន មករា បានហៅឪពុករបស់ខ្លួន ឈ្មោះ មួង រិន មកបញ្ឆេះម៉ាស៊ីនបើកបរទូក ជូនពួកគេដើរលេង។
ជាមួយគ្នានោះ ឪពុកក៏បានហៅកូនស្រី ២នាក់ទៀត (រិន ស្រីអូន និង រិន ស្រីរ័តន្ន) ឡើងជិះទូកលេងជាមួយគ្នាផងដែរ។ក្រោយពេលទូកបានបើកឃ្លាតចេញពីច្រាំងទន្លេ បានប្រហែល៤០ម៉ែត្រ ស្រាប់តែមានខ្យល់បក់ខ្លាំង បណ្ដាលឲ្យទូកនោះលិចតែម្ដង។ ដោយមានការជួយសង្គ្រោះពីអ្នកផ្សេង លោក មួង រិន និងមិត្តស្រីរបស់កូន បានរួចផុតពីគ្រោះថ្នាក់៕
Tag:
ហ៊ុន សែន
ម៉ៅ ភិរុណ
លិចទូក
© រក្សាសិទ្ធិដោយ thmeythmey.com