កីឡាជាតិ
ជាតិ
ស៊ីហ្គេម៖ កម្ពុជាដណ្តើមបានមេដាយប្រាក់៣ និងសំរឹទ្ធ៦ ដោយគិតត្រឹមថ្ងៃទី១ ខែធ្នូ ក្រុមកីឡាករសីប៉ាកតាក្រកម្ពុជា ពេលទទួលមេដាយប្រាក់។ រូបថត Camsoc
× មួយថ្ងៃក្រោយពិធីបើកផ្លូវការ កម្ពុជាដណ្តើមបានមេដាយប្រាក់៣ និងសំរឹទ្ធ៦ ពីព្រឹត្តិការណ៍កីឡាស៊ីហ្គេមលើកទី៣០នៅក្រុងម៉ានីល ប្រទេសហ្វីលីពីន។ មេដាយដែលកម្ពុជាទទួលបានកាលពីថ្ងៃទី១ ខែធ្នូ នោះ មានមេដាយប្រាក់២ និងសំរឹទ្ធ៦ ពីប្រភេទកីឡាដំបងខ្លី Arnis និងមេដាយប្រាក់១ពីកីឡាសីប៉ាកតាក្រ។
អត្តពលិកដែលប្រកួតប្រជែងក្នុងកីឡា Arnis ប្រភេទកីឡាប្រពៃណីរបស់ហ្វីលីពីននោះ សុទ្ធតែជាអត្តពលិកគុនល្បុក្កតោ។ កីឡាករ យ៉ុង ម៉េងលី រកបានមេដាយប្រាក់១លើវិញ្ញាសា LS LIGHTWEIGHT (+60 KG LESS 65 KG) និងមេដាយប្រាក់១ទៀត រកបានដោយកីឡាការិនី ស៊ីវ័ន្ត សូនីតា លើវិញ្ញាសា LS LIGHTWEIGHT (+55 KG LESS 60 KG)។
មេដាយប្រាក់១ទៀត នោះ គឺសម្រេចបានដោយក្រុមកីឡាករសីប៉ាតាក្រ លើវិញ្ញាសា SEPAK TAKRAW - HOOP EVENT ដោយមានសមាសភាពកីឡាករដូចជា នុត វិសាល, ហេង រ៉ាវុធ, ហួត សុវុត្ថា។
រីឯមេដាយសំរឹទ្ធ៦ក្នុងថ្ងៃដំបូងនោះ សុទ្ធតែរកបានដោយក្រុមអត្តពលិកល្បុក្កតោ ដែលចូលរួមប្រកួតលើប្រភេទកីឡា ARNIS ដែលក្នុងនោះរួមមាន កីឡាការិនី បូ ចន្ធី វិញ្ញាសា LS WELTERWEIGHT (+60 KG AND ABOVE), កីឡាការិនី យស់ សញ្ចនា វិញ្ញាសា LS FEATHERWEIGHT (+50 KG LESS 55 KG) កីឡាការិនី ខៀវ ចិន្តារ័ត្ន វិញ្ញាសា LS BANTAMWEIGHT (50 KG AND LESS) កីឡាករ មឿន ប៊ុនលី វិញ្ញាសា LS WELTERWEIGHT (+65 KG AND ABOVE) កីឡាករ ឌឹម ង៉ែត វិញ្ញាសា LS BANTAMWEIGHT (55 KG AND LESS) និងកីឡាករ សុខ ឈុន វិញ្ញាសា LS FEATHERWEIGHT (+55 KG LESS 60 KG)។
គិតត្រឹមថ្ងៃទី១ ខែធ្នូ ម្សិលមិញផងដែរ ម្ចាស់ផ្ទះហ្វីលីពីន ឈ្នះមេដាយមាសដល់ទៅ២២ ប្រាក់១២ និងសំរឹទ្ធ៩។ វៀតណាមឈរលំដាប់លេខ២ ដោយនាំមុខថៃ ម៉ាឡេស៊ី សិង្ហបុរី និងឥណ្ឌូណេស៊ី។ កម្ពុជា មីយ៉ាន់ម៉ា និងព្រុយណេ ដែលក្នុងតារាងក្រុមដែលរកបានមេដាយប្រាក់ ខណៈឡាវ រកបានមេដាយសំរឹទ្ធ២ រីឯទីម័រខាងកើត មិនទាន់មានមេដាយឡើយ។
កាលពីព្រឹត្តិការណ៍ឆ្នាំ២០១៧ នៅប្រទេសម៉ាឡេស៊ី កម្ពុជា រកបានមេដាយសរុប១៧ ក្នុងនោះមានមាស៣ ប្រាក់២ និងសំរឹទ្ធ១២៕
© រក្សាសិទ្ធិដោយ thmeythmey.com