ជាតិ
នយោបាយជាតិ
លោក កឹម សុខា ៖ ខ្ញុំមិនគាំទ្រអ្នកណា ដែលបង្កគ្រោះថ្នាក់ដល់ពលរដ្ឋខ្មែរ និងជាតិឡើយ
×![]()
ដោយ: ធឿន បញ្ញាឬទិ្ធ
ភ្នំពេញ៖ ស្របពេលដែលខ្លួនជាប់បម្រាមហាមធ្វើសកម្មភាពនយោបាយ និងបញ្ហាក្តីក្តាំនោះ លោក កឹម សុខា គ្មានពាក្យអ្វីក្រៅពីទទូចឲ្យអ្នកនយោបាយចេះរួបរួមគ្នា និងចេះស្រលាញ់ជាតិសាសន៍ខ្លួនឯងនោះទេ។ មេដឹកនាំអតីតគណបក្សសង្គ្រោះជាតិរូបនេះ អះអាងថា ខ្លួនមិនចង់ឃើញ និងមិនគាំទ្រអ្នកណា ដែលបង្កគ្រោះថ្នាក់ដល់ពលរដ្ឋខ្មែរ និងមាតុភូមិកម្ពុជាឡើយ។
«ការបង្រួបបង្រួមខ្មែរ គឺជាកាតព្វកិច្ច និងជាកិត្តិយសរបស់ខ្មែរ ជាពិសេសរបស់អ្នកដឹកនាំគ្រប់រូប»។ នេះសាររបស់លោក កឹម សុខា ដែលមិនចង់ឃើញមេដឹកនាំនយោបាយ នៅតែលេងនយោបាយកម្ចាត់គ្នាទៅវិញទៅមកឡើយ។ សម្រាប់លោក កឹម សុខា ការលេងនយោបាយកម្ចាត់គ្នានេះ វានឹងនាំឲ្យបាត់បង់ពេលវេលា និងធនធាន ដែលបម្រើការពារ និងកសាងមាតុភូមិកម្ពុជា ដើម្បីខ្មែរទាំងអស់គ្នា។
លោក កឹម សុខា ដែលកំពុងជាប់ក្តីក្តាំពីបទ «គប់គិតជាមួយបរទេស» នោះ ដឹងខ្លួនច្បាស់ថា គ្មានសិទ្ធិសេរីភាពពេញលេញក្នុងការនិយាយស្តីពីរឿងនយោបាយនេះឡើយ។ ប៉ុន្តែលោកព្យាយាមនិយាយដោយសម្តីប្រុងប្រយ័ត្ន ដើម្បីមិនរំលោភច្បាប់ និងប៉ះពាល់សិទ្ធិអ្នកដទៃនៅក្នុងនយោបាយនេះ។ តាមរយៈសំណេនៅលើហ្វេសប៊ុក លោក កឹម សុខា បានលើកយកវប្បធម៌នយោបាយអហិង្សារបស់ខ្លួន មកពន្យល់ថា លោកតែងតែបញ្ចៀសការបង្កជម្លោះជាមួយខ្មែរគ្នាឯង និងគ្រោះថ្នាក់ជាតិ ទោះបីស្ថិតនៅក្នុងកាលៈទេសៈណាក៏ដោយ។ ជាពិសេសលោក មិនគាំទ្រអ្នកណា ដែលបង្កគ្រោះថ្នាក់ដល់ពលរដ្ឋខ្មែរ និងមាតុភូមិកម្ពុជាឡើយ។
«ខ្ញុំក៏ដឹងច្បាស់ថាអ្វីដែលខ្ញុំអាចធ្វើបាន អ្វីដែលមិនអាចធ្វើបាន ទោះបីមានអ្នកខ្លះប្រឹងរុញច្រានឲ្យខ្ញុំចូលក្នុងអន្ទាក់គេក៏ដោយ ខ្ញុំនូវតែរក្សាជំហរ អហិង្សា មិនយកខ្មែរណាជាសត្រូវ មិនបង្កជម្លោះ មិនបង្កគ្រោះថ្នាក់ដល់អ្នកដ៏ទៃ និងប្រទេសជាតិខ្លួនឡើយ។ ខ្ញុំបានកំណត់ហើយថា ប្រជាពលរដ្ឋខ្មែរ ជាជនរួមជាតិ ជាជនរួមឈាម ជាបងប្អូនរបស់ខ្ញុំ ហើយប្រទេសកម្ពុជា ជាមាតុភូមិ ជាទឹកដីកំណើត ជាកន្លែងដែលខ្ញុំ កើត រស់ និងស្លាប់ ដែលខ្ញុំមិនអាចបោះបង់ និងមិនគាំទ្រអ្នកណាដែលបង្ករគ្រោះថ្នាក់ដល់ប្រជាពលរដ្ឋខ្មែរ និងមាតុភូមិកម្ពុជាឡើយ ទោះបីខ្ញុំស្ថិតក្នុងស្ថានភាពណាក៏ដោយចុះ»។ នេះជាការបញ្ជាក់របស់មេដឹកនាំអតីតគណបក្សសង្គ្រោះជាតិ។
ដ្បិតមិនអាចធ្វើសកម្មនយោបាយបាន ប៉ុន្តែលោក កឹម សុខា នៅតែអាចចុះតាមមូលដ្ឋានជួបប្រជាពលរដ្ឋ តាមរយៈសកម្មភាពមនុស្សធម៌ ដោយចែកអំណោយ និងដោះទុកលំបាកពួកគេ ជាពិសេសនៅក្នុងអំឡុងពេលទឹកជំនន់តែម្ដង។ រយៈពេល៣ខែ ដែលមេដឹកនាំអតីតបក្សប្រឆាំងរូបនេះ ចុះជួបពលរដ្ឋតាមមូលដ្ឋាននោះ លោក បានសិក្សាឃើញថា ពលរដ្ឋខ្មែរ គឺគួរឲ្យអាណិត ដោយសារតែពួកគេប្រឈមមុខរងគ្រោះព្រោះរឿងនយោបាយ។ ក្នុងន័យនេះ លោក កឹម សុខា ស្នើឲ្យអ្នកនយោបាយទាំងអស់ បញ្ឈប់សកម្មភាពអុចអាលឲ្យពលរដ្ឋស្អប់គ្នា ដោយសារនិន្នាការនយោបាយទៀត។
«ទឹកដីយើង មានភូមិសាស្ត្រ និងធនធានធម្មជាតិអំណោយផលល្អណាស់ ឲ្យតែយើងគ្រប់គ្រងបានត្រឹមត្រូវ មិនបំផ្លិចបំផ្លាញ។ រីឯប្រជាពលរដ្ឋខ្មែរភាគច្រើនជាទូទៅមានទឹកចិត្តល្អគួរឲ្យគោរពស្រឡាញ់ណាស់ បើយើងមិនលើកទឹកចិត្តឲ្យមានការរើសអើង សងសឹកគ្នានោះទេ ខ្មែរអាចរស់នៅដោយ ឯករាជ្យភាព ដោយសុខដុមរមនា និងដោយវឌ្ឍនភាពសម្រាប់ខ្មែរដូចគ្នា»។ នេះជាការលើកឡើងរបស់លោក កឹម សុខា។
មិនមែនជាលើកទី១ទេ ដែលមេដឹកនាំអតីតគណបក្សប្រឆាំងរូបនេះ ស្នើឲ្យអ្នកនយោបាយបង្រួបបង្រួមគ្នា ហើយឈប់លេងនយោបាយកម្ចាត់គ្នានេះ។
អត្ថបទទាក់ទង
រយៈពេល៣ឆ្នាំហើយ ដែលលោក កឹម សុខា ត្រូវបានតុលាការចោទពីបទ «គប់គិតជាមួយបរទេស»។ បតុលាការបានចាប់ផ្ដើមដំណើរការក្តីលោក កឹម សុខា នៅដើមឆ្នាំ២០២០នេះ ប៉ុន្តែត្រូវបានផ្អាកបណ្ដោះអាសន្នសិនវិញ ដោយសារការរាតត្បាតជំងឺកូវីដ-១៩ នៅកម្ពុជា ក៏ដូចជាពិភពលោក៕
Tag:
កឹម សុខា
នយោបាយ
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 11 ម៉ោង
