COVID-19
ជាតិ
វិជ្ជមានកូវីដ-១៩ បួននាក់ទៀតក្នុងនោះមានបុគ្គលិកហាង Pedro និងអតិថិជន Zando
× ក្រសួងសុខាភិបាល នាព្រឹកថ្ងៃពុធ ទី៩ ខែធ្នូ នេះ បានប្រកាសពីករណីឆ្លងកូវីដ-១៩ បួននាក់ទៀត ដែលពាក់ព័ន្ធនឹងព្រឹត្តិការណ៍សហគមន៍២៨វិច្ឆិកា ដែលធ្វើឲ្យចំនួនសរុបឡើងដល់៣៨នាក់។ ករណីថ្មីទាំង៤មាន បុគ្គលិកហាង Pedro ផ្លូវព្រះសីហនុ២នាក់ អតិថិជន Pedro ១នាក់ និងអតិថិជន Zando បឹងកេងកង ១នាក់។
តាមរបាយការណ៍ក្រសួង អ្នកជំងឺមានទីមួយ បុរសអាយុ៣៥ឆ្នាំ អាសយដ្ឋាននៅបឹងកេងកង៣ បានទៅហាង Zando បឹងកេងកង កាលពីថ្ងៃទី២៧ ខែវិច្ឆិកា។ ទីពីរ បុរសអាយុ២០ឆ្នាំ អាសយដ្ឋានសង្កាត់តាខ្មៅ ក្រុងតាខ្មៅ ខេត្តកណ្តាល និងទីបី ស្ត្រីអាយុ៣៣ឆ្នាំ នៅសង្កាត់ព្រែកឫស្សី ក្រុងតាខ្មៅ ជាបុគ្គលិកហាង Pedro ផ្លូវព្រះសីហនុ ដូចគ្នា។ ទី៤ បុរសអាយុ២៧ឆ្នាំ អាសយដ្ឋាននៅបឹងទំពុន បានចូលហាង Zando ហើយប៉ះពាល់ជាមួយអ្នកជំងឺម្នាក់ដែលត្រូវបានតេស្តវិជ្ជមានកាលពីថ្ងៃទី៣ ខែធ្នូ។
ករណីថ្មីទាំង៤នេះ នាំឲ្យអ្នកជំងឺដែលឆ្លងក្នុងព្រឹត្តិការណ៍សហគមន៍២៨វិច្ឆិកា ឡើងដល់៣៨នាក់។ កាលពីថ្ងៃម្សិលមិញ សំណាក៣៤៦៧ ត្រូវបានវិភាគដោយវិទ្យាស្ថានជាតិប៉ាស្ទ័រ ក្នុងនោះវិជ្ជមាន៤ រីឯសំណាក៤៩៩៤ទៀត ត្រូវបន្តវិភាគនៅថ្ងៃនេះ។
សរុបនៅកម្ពុជា អ្នកកើតកូវីដ-១៩ ឡើងដល់៣៥៤ករណី ក្នុងនោះ៣០៧ករណីសះស្បើយ។ អ្នកជំងឺដែលកំពុងសម្រាកព្យាបាល មាន៣៤នាក់នៅមន្ទីរពេទ្យមិត្តភាពខ្មែរ-សូវៀត និង១៣នាក់នៅមណ្ឌលសុខភាពចាក់អង្រែ៕
© រក្សាសិទ្ធិដោយ thmeythmey.com