ក្លិបយក្សនៅអឺរ៉ុចំនួន១២ បានប្រកាសចូលរួមក្នុងការប្រកួត Super League ដែលរួមមាន Liverpool, Manchester United, Arsenal, Chelsea, Manchester City, Tottenham Hotspure, Real Madrid, Barcelona, Atletico Madrid, Juventus, Inter Milan និង AC Milan។
 

បើតាមការចុះផ្សាយរបស់កាសែត BBC ស្របពេលត្រួតពិនិត្យលើកិច្ចព្រមព្រៀងលើការបង្កើនក្រុមពី៣២ ទៅ៣៦ ក្នុងក្របខណ្ឌ Champions League លោក Ceferin ដែលឡើងជាប្រធាន UEFA តាំងពីឆ្នាំ ២០១៦ បានបង្ហាញយ៉ាងច្បាស់ថាលោកមិនគាំទ្រ និងស្អប់ខ្ពើមចំពោះគម្រោង ESL នេះ។ ការចូលរួមរបស់ក្លិបទាំង១២ សម្រាប់ការបង្កើតពានថ្មីនេះ នឹងធ្វើឱ្យប៉ះពាល់ដល់ការប្រកួត Champions League និង Europa League មិនខាន។
 

«យើងទាំងអស់គ្នារួបរួមគ្នាប្រឆាំងនឹងគម្រោងមិនសមហេតុផលមួយនេះ។ រូបរួបរួមគ្នាប្រឆាំងនឹងសំណើរដែលគួរអោយស្អប់ខ្ពើម និងមានលក្ខណៈបម្រើខ្លួនឯងបែបនេះ។ អ្នកគាំទ្រគម្រោងនេះ គឺបានបង្ហាញពីភាពលោភលន់លើសអ្វីៗទាំងអស់»។ ប្រធានសហព័ន្ធកីឡាបាល់ទាត់អឺរ៉ុបអះអាងដូច្នេះ មុនបន្ថែមថា កីឡាកររូបណាចូលរួមព្រឹត្តិការណ៍ ESL នឹងត្រូវហាមឃាត់ពីការប្រកួត World Cup និងពានអឺរ៉ុប Euro។
 

លោក Ceferin សញ្ជាតិស្លូវេនី បានហៅគំនិតនៃការបង្កើពានរង្វាន់ថ្មី ESL នេះ ជាការប្រឆាំងនឹងអ្នកគាំទ្រកីឡាបាល់ទាត់ទាំងអស់លើពិភពលោក ហើយលោកប្តេជ្ញាមិនអនុញ្ញាតឱ្យគម្រោងមួយនេះកើតឡើងឡើយ។
 

ដោយឡែក សម្រាប់ក្លិបដែលចូលរួមគម្រោងនេះ ក៏ទំនងត្រូវហាមមិនឱ្យចូលរួមប្រកួតវគ្គពាក់កណ្តាលផ្តាច់ព្រ័ត្រ Champions League នៅរដូវកាលនេះផងដែរ។ នេះបើតាមការផ្សាយរបស់ទីភ្នាក់ងារព័ត៌មាន Reuters។
 

ក្នុងចំណោម៤ក្រុមឈានដល់វគ្គពាក់កណ្តាលផ្តាច់ព្រ័ត្រមាន៣ក្រុមបានគាំទ្រ ESL ដែលរួមមាន Manchester City, Chelsea និង Real Madrid។ ក្លិបយក្សបារាំង Paris Saint-Germain ដែលបដិសេធមិនចូលរួម អាចនឹងទទួលបានពានរង្វាន់ Champions League ដោយស្វ័យប្រវត្តិតែម្តង៕