ក្នុងកិច្ចសម្ភាសន៍ជាមួយសារព័ត៌មានថ្មីៗ លោក វ៉ី សំណាង ក៏បានសាទរដែលឃើញពលរដ្ឋចូលរួមយ៉ាងច្រើនលើសលប់ ក្នុងការរុះរើដោយស្ម័គ្រចិត្ត ដើម្បីជួយលើកកម្ពស់សោភ័ណភាពខេត្ត។ ប៉ុន្តែចំនួនផ្ទាំងគ្រឿងស្រវឹងដែលនៅសេសសល់ភាគច្រើន គឺនៅតាមដងផ្លូវសាធារណៈ ដែលមិនមែននៅចំពីមុខផ្ទះរបស់ពលរដ្ឋ។ 
 

អភិបាលខេត្តរូបនេះ ថ្លែងយ៉ាងដូច្នេះថា៖ «ខ្ញុំបានជិះឡានតាមមើលឃើញ ភាគច្រើនពលរដ្ឋគាត់រើបានច្រើនប្រមាណ៨០ភាគរយហើយ។ នៅសល់តែកន្លែងរបស់ក្រុមហ៊ុនតាមកន្លែងសាធារណ ដែលមិននៅចំមុខផ្ទះពលរដ្ឋ ព្រោះក្រុមការងារគាត់នៅមានកម្រិត។ អ៊ីចឹងអាច ពាក់កណ្ដាលខែនឹងហើយអស់ហើយ។ បើក្រុមហ៊ុនរុះរើមិនទាន់ យើងនឹងឲ្យក្រុមការងារចុះជួយរុះរើ ហើយថ្លៃរុះរើនិងថ្លៃខូចខាតក្រុមហ៊ុនផ្ទាំងគ្រឿងស្រវឹងហ្នឹងអ្នកចេញ។ យ៉ាងយូរចុងខែនេះ អាចរើសចេញអស់ហើយ»។ 
 

ទន្ទឹមនឹងនេះ លោក វ៉ី សំណាង ក៏បានកោសសសើរពលរដ្ឋក្នុងខេត្តរបស់ខ្លួន និងអំពាវនាវឲ្យពលរដ្ឋ បន្តមានស្មារតីចូលជាមួយគ្នាជានិច្ច ដើម្បីអភិវឌ្ឍខេត្ត។ 

ពលរដ្ឋដែលស្ម័គ្រចិត្តរុះរើផ្ទាំងផ្សព្វផ្សាយគ្រឿងស្រវឹងក្នុងខេត្តកំពង់ស្ពឺ ដោយពេលចិត្តព្រោះយល់ថា ចំណាត់ការរបស់អភិបាលខេត្ត គឺជារឿងដ៏ល្អ ដែលលែងមានផ្ទាំងផ្សព្វផ្សាយគ្រឿងស្រវឹង នៅតាមបណ្ដោយផ្លូវ ពិសេសកុំឲ្យក្មេងៗជំនាន់ក្រោយយល់ដឹងតែគ្រឿងស្រវឹង។ 

 

កន្លងមកលោកស្រី សុ ផានណា រស់នៅក្រុងច្បារមន ដែលបានរុះរើផ្ទាំងប៉ាណូផ្សាយគ្រឿងស្រវឹង បានអះអាងប្រាប់សារព័ត៌មានថ្មីៗថា ក្នុងនាមជាពលរដ្ឋ អ្នកស្រីពេញចិត្តរុះរើផ្ទាំងផ្សាយគ្រឿងស្រវឹង ដើម្បីចូលរួមជាមួយថ្នាក់ដឹកនាំខេត្ត ដែលបានចេញមុខធ្វើជាគំរូល្អមុនគេនេះ។ លោកស្រី ផានណា ថ្លែងប្រាប់សារព័ត៌មានថ្មីៗតាមទូរស័ព្ទថា៖«រុះរើ (ផ្ទាំងផ្សព្វផ្សាយគ្រឿងស្រវឹង) អ៊ីចឹងជារឿងល្អ បើដាក់តាមមុខផ្ទះចឹង ក្មេងៗជំនាន់ក្រោយ យល់តែពីការលក់គ្រឿងស្រវឹង»៕ 

 

៖