ចូលឆ្នាំ៖ ពលរដ្ឋជាង ៤ម៉ឺននាក់ ជិះរថយន្តក្រុងសាធារណៈទៅស្រុកកំណើត និងមកភ្នំពេញវិញ

ជាតិ

ចូលឆ្នាំ៖ ពលរដ្ឋជាង ៤ម៉ឺននាក់ ជិះរថយន្តក្រុងសាធារណៈទៅស្រុកកំណើត និងមកភ្នំពេញវិញ

18, Apr 2023 , 12:09 pm

រូបភាព

រូបភាពពលរដ្ឋធ្វើដំណើរតាមរថយន្តក្រុងសាធារណៈទៅស្រុកកំណើតក្នុងឱកាសពិធីបុណ្យចូលឆ្នាំខ្មែរ។ រូបភាព៖ ញឹក ស្រីល័ក្ខ

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ ប្រជាពលរដ្ឋជាង ៤ម៉ឺន៦ពាន់នាក់ បានមកប្រើប្រាស់សេវារថយន្តក្រុងសាធារណៈ ដែលរដ្ឋបាលរាជធានីភ្នំពេញ រៀបចំសម្រាប់ដឹកជញ្ជូនពលរដ្ឋទៅស្រុកកំណើតក្នុងឱកាសពិធីបុណ្យចូលឆ្នាំខ្មែរ។ លោក កែវ ចាន់ណារិទ្ធ អភិបាលរដ្ឋាករស្វយ័តដឹកជញ្ជូនសាធារណៈរថយន្តក្រុង ប្រាប់សារព័ត៌មាន Thmey Thmey 25 ថា នេះជាចំនួនមួយច្រើន បើប្រៀបធៀបនឹងឆ្នាំមុនៗ ជាពិសេសជួយកាត់បន្ថយចំណាយរបស់ពលរដ្ឋបានច្រើនផងដែរ។

ចាប់ពីថ្ងៃទី១៣-១៧ មេសា រដ្ឋបាលរាជធានីភ្នំពេញ បានរៀបចំរថយន្តក្រុងចំនួន ៣៤៥គ្រឿង សម្រាប់ដឹកពលរដ្ឋទៅស្រុកកំណើតដោយឥតគិតថ្លៃ។ រថយន្តក្រុងទាំង ៣៤៥គ្រឿងនេះ រដ្ឋបាលរាជធានីភ្នំពេញ បានបែងចែក ៧០គ្រឿងសម្រាប់ដឹកជញ្ជូនពលរដ្ឋនៅរាជធានីភ្នំពេញ។ ចំណែក ២៧៥គ្រឿងទៀតសម្រាប់ដឹកជញ្ជូនពលរដ្ឋពីរាជធានីភ្នំពេញទៅកាន់បណ្ដាខេត្តមួយចំនួន។

លោក កែវ ចាន់ណារិទ្ធ អភិបាលរដ្ឋាករស្វយ័តដឹកជញ្ជូនសាធារណៈរថយន្តក្រុង។ រូបភាពពីរដ្ឋាករស្វយ័តដឹកជញ្ជូនសាធារណៈរថយន្តក្រុង

ក្នុងរយៈពេល៥ថ្ងៃ នៃការផ្ដល់សេវាដល់ប្រជាពលរដ្ឋដោយឥតគិតថ្លៃនេះ មានពលរដ្ឋជាង ៤ម៉ឺន៦ពាន់នាក់ បានមកទទួលសេវារថយន្តក្រុងសាធារណៈ។ បើតាមលោក កែវ ចាន់ណារិទ្ធ អភិបាលរដ្ឋាករស្វយ័តដឹកជញ្ជូនសាធារណៈរថយន្តក្រុង ខេត្តសៀមរាបមានពលរដ្ឋធ្វើដំណើរច្រើនរហូតដល់ជាង១ម៉ឺន៧ពាន់នាក់។

ចំពោះចំនួនពលរដ្ឋមកទទួលសេវារថយន្តក្រុងជាង ៤ម៉ឺន៦ពាន់នាក់នេះ លោក កែវ ចាន់ណារិទ្ធ ចាត់ទុកថាជាចំនួនមួយដែលច្រើន បើប្រៀបធៀបនឹងឆ្នាំមុនៗ។ «អ្វីដែលយើងចង់បាន គឺបម្រើសេវាឱ្យល្អជូនប្រជាពលរដ្ឋ។ ប៉ុន្តែអ្វីដែលយើងទទួលបាន គឺការកោតសរសើរពីប្រជាពលរដ្ឋ។ ខ្ញុំ និងក្រុមការងារសប្បាយចិត្ត ពេលជូនពលរដ្ឋទៅដល់ទីតាំងដោយសុវត្ថិភាព»។ នេះជាការលើកឡើងរបស់លោក កែវ ចាន់ណារិទ្ធ ដោយបន្តថា ការផ្ដល់សុវត្ថិភាព ផាសុកភាព និងអនាម័យ ជាគោលការណ៍របស់រដ្ឋាករស្វយ័តដឹកជញ្ជូនសាធារណៈរថយន្តក្រុង។

រថយន្តក្រុងដែលដឹកពលរដ្ឋទៅស្រុកកំណើត សុទ្ធតែទៅដល់គោលដៅទាំងអស់ និងទទួលបានការសម្របសម្រួលពីអាជ្ញាធរខេត្តនីមួយៗ។ អភិបាលរដ្ឋាករស្វយ័តដឹកជញ្ជូនរូបនេះ អះអាងថា នៅតាមខ្សែផ្លូវដែលបានរៀបចំ គឺមានត្រៀងជាងចល័តចាំជួយក្នុងករណីរថយន្តមានបញ្ហាផងដែរ៕

អត្ថបទទាក់ទង

រដ្ឋបាលរាជធានីភ្នំពេញ នឹងពិចារណាផ្ដល់រថយន្តក្រុងដឹកពលរដ្ឋឱ្យបានគ្រប់ខេត្ត នៅពេលមានតម្រូវការច្រើន

លោក ឃួង ស្រេង៖ ជិះរថយន្តក្រុងឥតគិតថ្លៃ ជួយកាត់បន្ថយចំណាយ និងទប់ស្កាត់ការឡេីងថ្លៃរបស់ក្រុមហ៊ុនមួយចំនួន

រដ្ឋាករស្វយ័តរថយន្តក្រុងត្រៀមបុគ្គលិកជាង ៥០០នាក់ បម្រើសេវាដល់ពលរដ្ឋឥតគិតថ្លៃនៅថ្ងៃចូលឆ្នាំ

ចូលឆ្នាំ! ឡានក្រុង៣៤៥គ្រឿង ត្រៀមដឹកពលរដ្ឋទៅតាមរាជធានី-ខេត្ត