មុនការបោះឆ្នោតសភាមួយថ្ងៃ បក្សភឿថៃ បានប្រកាសរួមបញ្ចូលបក្ស Palang Pracharath ក្នុងសម្ព័ន្ធបក្សនយោបាយខ្លួនដែលមានបក្សចូលរួមចំនួន ១០រួចមកហើយ។ 

 

ការចូលរួមរបស់បក្ស Palang Pracharath របស់លោកឧបនាយករដ្ឋមន្រ្តី Prawit Wongsuwan កាន់តែធ្វើឱ្យលោក Srettha Thavisin បេក្ខជននាយករដ្ឋមន្រ្តីរបស់បក្សភឿថៃ មានឱកាសកាន់តែខ្ពស់ក្នុងការកាន់តំណែងជាប្រមុខរដ្ឋាភិបាលថៃថ្មី។ 

 

មុនការចូលរួមរបស់បក្ស Palang Pracharath បក្សជាតិថៃរួបរួម ក៏បានចូលរួមនៅក្នុងសម្ព័ន្ធបក្សនយោបាយមួយនេះដែរ។ 

 

ពេលនេះ សម្ព័ន្ធបក្សនយោបាយដឹកនាំដោយបក្សភឿថៃ មានបក្សនយោបាយចូលរួមចំនួន ១១ និងមានកៅអីនៅក្នុងរដ្ឋសភាចំនួន ៣១៤អាសនៈ។ នេះចំនួនចំនួនដ៏ច្រើនមួយ ដែលរដ្ឋាភិបាលថៃថ្មី នឹងមានសំឡេងភាគច្រើននៅក្នុងរដ្ឋសភា។ 

 

តាមការចុះផ្សាយរបស់សារព័ត៌មាន Thai Enquirer សម្ព័ន្ធបក្សនយោបាយមួយនេះ បានឯកភាព ក្នុងការជ្រើសរើសបេក្ខជននាយករដ្ឋមន្រ្តីមកពីបក្សភឿថៃ សម្រាប់ការបោះឆ្នោតសភានៅថ្ងៃទី២២ ខែសីហា។ 

 

សូមបញ្ជាក់ថា នៅក្នុងការបោះឆ្នោតរើសនាយករដ្ឋមន្រ្តីដោយព្រឹទ្ធសភា និងរដ្ឋសភាថ្ងៃទី២២ ខែសីហា បេក្ខជននាយករដ្ឋមន្រ្តី ចាំបាច់ត្រូវតែទទួលបានសំឡេងគាំទ្រលើសពី៣៧៥អាសនៈ ពោលគឺលើសពីពាក់កណ្តាលនៃអាសនៈ ៧៥០៕