ជាតិ
លោក ហ៊ុន ម៉ានី លើកទឹកចិត្តឱ្យបេក្ខជនបន្តចូលប្រឡងមន្រ្តីកសិកម្មឃុំ ទោះមិនជាប់លើកនេះ
×![]()
នៅថ្ងៃទី២២ ខែធ្នូនេះ ក្រសួងមុខងារសាធារណៈ បានប្រកាសលទ្ធផលបេក្ខជនប្រឡងជ្រើសរើសមន្រ្តីកសិកម្មឃុំ ដែលប្រឡងកាលពីថ្ងៃទី១៧ ខែធ្នូ។ តាមរយៈការប្រឡងនេះ បានរកឃើញបេក្ខជនប្រឡងជាប់ចំនួន ២៥០នាក់ ក្នុងនោះមានស្រ្តីចំនួន ៩៤នាក់ផងដែរ។ លោក ហ៊ុន ម៉ានី បានលើកទឹកចិត្តឱ្យបេក្ខជនបន្តចូលប្រឡងមន្រ្តីកសិកម្មឃុំ ទោះមិនជាប់លើកនេះ។
ក្នុងដំណើរការរៀបចំប្រកាសលទ្ធផលនៅព្រឹកថ្ងៃទី២២ ខែធ្នូនេះ លោក ហ៊ុន ម៉ានី រដ្ឋមន្រ្តីក្រសួងមុខងារសាធារណៈ បានវាយតម្លៃថា បេក្ខជនដែលប្រឡងជាប់ សុទ្ធសឹងតែជាបេក្ខជនមានសមត្ថភាពពិតប្រាកដ ទាំងចំណេះដឹងទូទៅ ជំនាញ និងភាសា។ ជាមួយគ្នានេះ រដ្ឋមន្រ្តីក្រសួងមុខងារសាធារណៈរូបនេះ សំណូមពរដល់ប្រជាកសិករ និងអាជ្ញាធរមូលដ្ឋាន ស្វាគមន៍ និងជឿជាក់លើមន្រ្តីកសិកម្មឃុំ ដែលប្រឡងជាប់នៅឆ្នាំនេះ។
សូមអញ្ជើញទស្សនាវីដេអូខាងក្រោមនេះដូចតទៅ៖
«កុំគិតថា បរាជ័យមួយ នាំឱ្យបាក់ទឹកចិត្ត ហើយគិតថាជាចំណុចចុងក្រោយ។ ម្ដងហើយ ម្ដងទៀត ការខិតខំប្រឹងប្រែង ពុះពារណនឹងនាំឱ្យយើងជោគជ័យ»។ នេះជាការលើកឡើងរបស់លោក ហ៊ុន ម៉ានី ដោយបន្តលើកទឹកចិត្តដល់បេក្ខជនដែលមិនជាប់នៅឆ្នាំនេះ បន្តចុះឈ្មោះប្រឡងនៅឆ្នាំក្រោយៗទៀត។
ក្រោយប្រឡងជាប់ មន្រ្តីកសិកម្មឃុំទាំង ២៥០នាក់ នឹងត្រូវចូលរួមវគ្គបណ្ដុះបណ្ដាលរយៈពេល ១ឆ្នាំជាមុនសិន នៅខែកុម្ភៈ ឆ្នាំ២០២៤ខាងមុខ។ សូមបញ្ជាក់ តាមរយៈការប្រឡងនេះ ក្រសួងមុខងារសាធារណៈ និងក្រសួងកសិកម្ម ក៏បានរៀបចំបេក្ខជនបម្រុងចំនួន ១០នាក់ក្នុងមួយស្រុក ដើម្បីត្រៀមក្នុងករណីបេក្ខជនឈប់ដោយប្រការណាមួយ៕
Tag:
មន្រ្តីកសិកម្មឃុំ
ហ៊ុន ម៉ានី
© រក្សាសិទ្ធិដោយ thmeythmey.com
