ជាតិ
២៥ខេត្ត/រាជធានី
នាយិកាអង្គការសេដាក ចង់ឲ្យកសិករខ្មែររៀនសូត្រពីបច្ចេកទេសដាំកាហ្វេពីកសិករឡាវ
× ខេត្តចម្ប៉ាសាក់ (ឡាវ)៖ ដំណាំកាហ្វេ ត្រូវបានប្រជាកសិករខ្មែរនៅខេត្តមណ្ឌលគិរី ដាំដុះយ៉ាងច្រើនក្នុងរយៈពេលប៉ុន្មានឆ្នាំចុងក្រោយនេះ។ តាមរយៈដំណើរទស្សនកិច្ចសិក្សាពីដំណាំកាហ្វេនៅខេត្តចម្ប៉ាសាក់ ប្រទេសឡាវ ដែលអង្គការសេដាកបានរៀបចំលោកស្រី តុង ចាន់ធាង ចង់ឲ្យកសិករខ្មែររៀនសូត្រពីបច្ចេកទេសដាំកាហ្វេពីកសិករឡាវ។ ក្នុងបទសម្ភាសជាមួយសារព័ត៌មានថ្មីៗនៅប្រទេសឡាវ នាយិកាអង្គការកសិកម្មរូបនេះ បានបញ្ជាក់ថា ការដាំដុះកាហ្វេរបស់កសិករជនជាតិឡាវ ជាការដាំដុះដែលមានបច្ចេកទេសល្អ ហើយកសិករខ្មែរគួររៀនសូត្រតាម ដើម្បីទទួលទិន្នផលល្អ។
បច្ចេកទេសដាំកាហ្វេរបស់កសិករជនជាតិឡាវទទួលបានទិន្នផលច្រើនជាង និងខុសប្លែកពីបច្ចេកទេសដាំកាហ្វេករបស់សិករខ្មែរ។ កសិករឡាវលោក សំប៊ុន សាយបរកែវ បានជ្រើសយកការដាំដុះបែបកសិ-រុក្ខកម្ម ដែលមានដំណាំចម្រុះដូចជាដើមឈើធំៗ, ដើមឈើហូបផ្លែ និងប្រភេទដំណាំគម្របដី ដូចជាពោត, សណ្តែបារាំង, ស្ពៃក្តោប និងបន្លែផ្សេងៗទៀត។
ការដាំដំណាំចម្រុះក្នុងចម្ការកាហ្វេនេះ បានផ្ដល់ជីវជាតិដល់ដីនៅពេលដែលស្លឹកឈើជ្រុះរលួយក្លាយជាជី និងជាម្លប់ការពារកម្តៅថ្ងៃសម្រាប់ដើមកាហ្វេ ព្រោះដំណាំនេះមិនត្រូវការកម្តៅថ្ងៃខ្លាំងពេកទេ។ ម្យ៉ាងវិញទៀត កាហ្វេ Arabica របស់កសិករជនជាតិឡាវលោក សំប៊ុន សាយបរកែវ ដែលមានគុណភាពល្អនេះ ជាផ្នែកមួយកើតចេញពីការដាំដុះបែបកសិ-រុក្ខកម្មនេះផងដែរ។
ក្នុងដំណើរទស្សនកិច្ចរបស់អង្គការសេដាកទៅកាន់ប្រទេសឡាវ កាលពីថ្ងៃទី២៦-២៩ ធ្នូកាលពីថ្មីៗនេះ លោកស្រី តុង ចាន់ធាង នាយិកាអង្គការសេដាក បានប្រាប់ឲ្យដឹងថា លោកស្រី ចង់ឲ្យកសិករខ្មែរដែលដាំកាហ្វេរៀនសូត្រពីបច្ចេកទេសរបស់កសិករឡាវលោក សំប៊ុន សាយបរកែវ ដែលក្រុងការងារអង្គកាសេដាក បានចុះទៅសិក្សាផ្ទាល់ដល់ចម្ការរបស់លោកនៅស្រុកប៉ាកសង ខេត្តចម្ប៉ាសាក់។
សំឡេងលោកស្រី តុង ចាន់ធាង នាយការអង្គការសេដាក៖
នាយិកាអង្គការសេដាករូបនេះ បានចាប់អារម្មណ៍នឹងបច្ចេកទេសដាំដំណាំកាហ្វេបែបកសិ-រុក្ខកម្មរបស់កសិករឡាវ ដោយលោកស្រីលើកឡើងយ៉ាងដូច្នេះ៖ «នេះជាបច្ចេកទេសមួយ ដែលកសិករឡាវរៀនសូត្រពីអ្នកជំនាញ ហើយគាត់បានពិសោធន៍ដោយខ្លួនឯង ទើបដំណាំកាហ្វេរបស់គាត់ទទួលបានលទ្ធផលល្អបែបនេះ»។
សូមបញ្ជាក់ថា កាលពីថ្ងៃទី២៦-២៩ ធ្នូកន្លងទៅ មជ្ឈមណ្ឌលសិក្សា និងអភិវឌ្ឍកសិកម្មកម្ពុជា (អង្គការសេដាក) បានដឹកនាំតំណាងហាងកាហ្វេសរីរាង្គ, សមាគមអ្នកផលិតកសិផលសរីរាង្គ, បុគ្គលិកសេដាក និងអ្នកសារព័ត៌មានចំនួនសរុបចំនួន១២នាក់ មកសិក្សាស្វែងយល់ពីកាហ្វេសរីរាង្គនៅខេត្តចម្ប៉ាសាក់ ប្រទេសឡាវ។ ដំណើរទស្សនកិច្ចរយៈពេល៤ថ្ងៃនេះ ក៏មានគោលបំណងផ្សារភ្ជាប់ទីផ្សារកាហ្វេកម្ពុជា និងឡាវ រួមទាំងការពង្រីកទីផ្សារកាហ្វេផងដែរ៕
© រក្សាសិទ្ធិដោយ thmeythmey.com