ជាតិ
សេដាក គ្រោងផ្សារភ្ជាប់កាហ្វេ Arabica របស់កសិករឡាវ មកបំពេញទីផ្សារកម្ពុជា
× ខេត្តចម្ប៉ាសាក់ (ឡាវ)៖ អង្គការសេដាក បានសិក្សា និងមានគម្រោងសម្របសម្រួលឲ្យមានការនាំចូលកាហ្វេ Arabica របស់ឡាវ មកលើទីផ្សារកម្ពុជា ដើម្បីផ្សារភ្ជាប់ទីផ្សារកាហ្វេដែលដាំដុះដោយកសិករ។ គម្រោងនៃការនាំចូលកាហ្វេប្រភេទ Arabica នេះ អង្គការសេដាកយល់ឃើញថានៅខេត្តចម្ប៉ាសាក់ ប្រទេសឡាវ អំណោយផលលើដំណាំកាហ្វេ Arabica ដែលមានគុណភាពល្អ និងរសជាតិឆ្ងាញ់។ លោកស្រី តុង ចាន់ធាង នាយិកាអង្គការសេដាក បានពន្យល់ពីមូលហេតុដែលជ្រើសរើស Arabica ឡាវ ដោយសារតែនៅខេត្តចម្ប៉ាសាក់ កសិករមានការដាំដុះតាមលក្ខណៈធម្មជាតិ ដែលងាយស្រួលក្នុងការផ្លាស់ប្ដូរមកកសិកម្មសរីរាង្គ។
ក្នុងដំណើរទស្សនកិច្ចទៅកាន់ប្រទេសឡាវ កាលពីថ្ងៃទី២៦-២៩ធ្នូកន្លងទៅ លោកស្រី តុង ចាន់ធាង នាយិកាអង្គការសេដាក បានលើកឡើងថា៖ «ទំហំផលិតកម្មពូជកាហ្វេ Arabica របស់កសិករឡាវមានច្រើន វាជាសក្តានុពលមួយសម្រាប់កម្ពុជាដែលត្រូវការកាហ្វេនេះច្រើន។ ម្យ៉ាងទៀត ផលិតផលក្នុងស្រុករបស់យើងមិនមានគ្រប់គ្រាន់ ហើយកម្ពុជាមិនមានពូជ Arabica ច្រើនទេ ទើបសេដាកគ្រោងនាំចូលកាហ្វេនេះ»។
លោកស្រី តុង ចាន់ធាង នាយិកាអង្គការសេដាក៖
បើតាមលោកស្រី តុង ចាន់ធាង សេដាក នឹងបញ្ជាក់គុណភាពសរីរាង្គកាហ្វេ Arabica ឡាវ ដើម្បីនាំចូលមកកម្ពុជា ហើយគម្រោងសហការជាមួយកសិករឡាវ នឹងចាប់ផ្ដើមក្នុងឆ្នាំ២០១៩នេះ។ ក្រៅពីសហការជាមួយកសិករឡាវក្នុងការនាំចូលកាហ្វេ Arabica អង្គការសេដាក នឹងប្រើរយៈពេលប្រមាណ៣ឆ្នាំ ក្នុងការបំលែងដីចម្ការកាហ្វេពីការដាំតាមគោលការណ៍ធម្មជាតិ ទៅជាកាហ្វេដែលស្របតាមស្ដង់ដារសរីរាង្គវិញ។
នាយិកាសេដាកដែលបានចុះដល់ចម្ការកាហ្វេជនជាតិឡាវនៅស្រុកប៉ាកសង ខេត្តចម្ប៉ាសាក់ ជាមួយនឹងអ្នកជំនួញកាហ្វេនៅកម្ពុជា និងអ្នកសារព័ត៌មាន ThmeyThmey.com និងអង្គភាពព័ត៌មាន Fresh News ដោយលោកស្រីពន្យល់ពីមូលហេតុដែលជ្រើសរើសកាហ្វេ Arabica ឡាវ ព្រោះតែនៅខេត្តចម្ប៉ាសាក់ មានការដាំដុះតាមលក្ខណៈធម្មជាតិ ដែលងាយស្រួលក្នុងការផ្លាស់ប្ដូរមកជាកសិកម្មសរីរាង្គ។
សូមបញ្ជាក់ថា ខេត្តចម្ប៉ាសាក់ ប្រទេសឡាវ អំណោយផលលើការដាំកាហ្វេ Arabica ដោយមានរយៈកម្ពស់រហូតដល់១២៩៤ម៉ែត្រ។ ម្យ៉ាងវិញទៀត កាហ្វេ Arabica មានជាតិកាហ្វេអ៊ីនខ្សោយ ខណៈដែល Robusta មានជាតិកាហ្វេអ៊ីនខ្លាំងផងដែរ។ រីឯខេត្តមណ្ឌលគិរី នៅកម្ពុជាវិញ អំណោយផលលើដំណាំកាហ្វេ Robusta ៕
Tag:
ឡាវ
សេដាក
កាហ្វេ
Arabica
Robusta
© រក្សាសិទ្ធិដោយ thmeythmey.com