ជាតិ
សង្គមជាតិ
តុលាការ ចាត់ទុកសម្តីប្រធានបក្សខ្មែរក្រោកជាការញុះញង់ ដែលធ្វើឲ្យពលរដ្ឋបាត់ជំនឿលើប្រព័ន្ធយុត្តិធម៌
× ភ្នំពេញ៖ ប្រធានគណបក្សខ្មែរក្រោក កំពុងប្រើប្រាស់សម្ដីញុះញង់ ដែលធ្វើឲ្យប្រជាពលរដ្ឋបាត់ជំនឿចិត្តលើសេចក្តីសម្រេចរបស់តុលាការ។ នេះជាការលើកឡើងរបស់តុលាការកំពូល ជុំវិញពាក្យសម្តីរបស់លោក សុខសុវណ្ណ វឌ្ឍនា សារពង្ស បានសរសេរលើគណនីហ្វេសប៊ុកខ្លួនឈ្មោះ William Guang។
ឆ្លើយតបសម្តីប្រធានគណបក្សខ្មែរក្រោកនេះ តុលាការកំពូល បានលើកហេតុផលមកពន្យល់ថា ការសម្រេចរបស់ស្ថាប័នខ្លួននេះ គឺផ្អែកទៅលើសាលដីការបស់សាលាឧទ្ធរណ៍ ដែលបានតម្កល់សាលក្រមរដ្ឋប្បវេណីរបស់សាលាដំបូងខេត្តព្រះសីហនុ។ ផ្អែកលើហេតុផលនេះ តុលាការកំពូលអះអាងថា សាលក្រម និងសាលដីកានេះ បានសម្រេចសេចក្តីអំពីអត្ថិភាព ឬនត្ថិភាពនៃសិទ្ធិរបស់ភាគីលើដីទំនាស់ ដោយផ្អែកលើអង្គហេតុ ភស្តុតាង និងអង្គច្បាប់ច្បាស់លាស់។
អមជាមួយទឡ្ហីករណ៍ទាំងនេះ តុលាការកំពូល បានសង្កត់ធ្ងន់ថា រាល់ពាក្យសម្តីចោទប្រកាន់របស់ប្រធានគណបក្សខ្មែរក្រោក ដែលគេដឹងថាជាម្ចាស់គណនីឈ្មោះ William Guang នោះ មិនបានពន្យល់ពីចំណុចសាលដីកាខុសច្បាប់កន្លែងណា និងគ្មានសំអាងហេតុអ្វីមកបញ្ជាក់នោះទេ។ ដោយសារគ្មានភស្តុតាងច្បាប់មកបញ្ជាក់ដូច្នេះ ទើបតុលាការកំពូល ចាត់ទុកពាក្យសម្តីរបស់ប្រធានគណបក្សខ្មែរក្រោក ជាការញុះញង់ ដែលធ្វើឲ្យប្រជាពលរដ្ឋបាត់ជំនឿចិត្តលើសេចក្តីសម្រេចរបស់តុលាការ។
លិខិតរបស់តុលាការកំពូល ចុះថ្ងៃទី៥ មីនា បានសរសេរដូច្នេះថា៖«ម្ចាស់គណនីឈ្មោះ William Guang បានចោទប្រកាន់បន្ថែមទៀតថា យកដីរដ្ឋមកកាត់ចែកឯកជន ។ នេះគឺជាការចោទប្រកាន់ដោយអសុទ្ធចិត ព្រមទាំងធ្វើការផ្សព្វផ្សាយជាសាធារណៈ ដោយបំភាន់ ញុះញង់ ក្នុងគោលបំណងធ្វើឲ្យបាត់ជំនឿលើសេចក្តីសម្រេចរបស់តុលាការ ពីព្រោះថា ដីដែលជាកម្មវត្ថុនៃវិវាទ គឺជាដីបានមកពីការទិញ-លក់ ហើយក្រសួងមានសមត្ថកិច្ចបានចេញប័ណ្ណសម្គាល់សិទ្ធិកាន់កាប់អចលនវត្ថុឲ្យទៀតផង មិនមែនជាដីរដ្ឋទេ។ ដូច្នេះតុលាការគ្រាន់តែអនុវត្តតួនាទីរបស់ខ្លួន ដើម្បីផ្ដល់យុត្តិធម៌ឲ្យគូភាគី នៅពេលមានបណ្ដឹង ស្របតាមរដ្ឋធម្មនុញ្ញ និងច្បាប់ជាធរមានតែប៉ុណ្ណោះ»។
ដោយអះអាងពីជំហរខ្លួនបែបនេះហើយ តុលាការកំពូល បានប្រាប់ទៅប្រធានគណបក្សខ្មែរក្រោកទៀតថា សាលដីកាខ្លួន រហូតមកដល់ពេលនេះ នៅតែមានតម្លៃគតិយុត្តិ ពីព្រោះមិនទាន់មានស្ថាប័ន ឬសមត្ថកិច្ចណាបដិសេធ ឬទុកជាមោឃៈឡើយ។
មុនតុលាការកំពូលចេញឆ្លើយតបនេះ ក៏មានខាងរដ្ឋបាលខេត្តព្រះសីហនុ បកស្រាយប្រាប់ប្រធានគណបក្សខ្មែរក្រោកដែរ។ ដើមចមដែលនាំឲ្យមានការឆ្លើយឆ្លងសម្តីគ្នានេះ កើតឡើងក្រោយពីលោក សុខសុវណ្ណ វឌ្ឍនា សារពង្ស បានសរសេរលើគណនីហ្វេសប៊ុកខ្លួនឈ្មោះ William Guang ថា អភិបាលខេត្តព្រះសីហនុ មានថ្លើមធំពាសមេឃ ហ៊ានមើលងាយអនុសាសន៍របស់សម្ដេច ហ៊ុន សែន តាមរយៈការចេញលិខិតអនុញ្ញាត្តិឲ្យឈូសឆាយធ្វើរបងលើដីទំនាស់ភូមិគគីដែលជាដីរបស់រដ្ឋ ហើយស្ថិតក្រោមសាលដីកាខុសច្បាប់នៅឡើយ ។
ក្នុងន័យនេះប្រធានគណបក្សខ្មែរក្រោក បានសង្កត់ធ្ងន់ថា តុលាការកំពូលបានចេញសេចក្ដីសម្រេចទាំងខុសបែបបទគតិយុត្តិ ដែលធ្វើឲ្យលោក យន្ត មីន កំពុងអនុវត្តទាំងបំពានលើមតិណែនាំរបស់សម្ដេចនាយករដ្ឋមន្ត្រី និងបំពានលើសេចក្ដីជូនដំណឹងរបស់ក្រសួងកសិកម្ម រុក្ខាប្រមាញ់ និងនេសាទ ដែលចុះកាលពីថ្ងៃទី៣១ មករា ឆ្នាំ២០១៩ ទៀតផង ។
តែយ៉ាងណាបញ្ហាដីធ្លីខេត្តព្រះសីហនុនេះ ក៏មានវិធានការភ្លាមៗពីសម្ដេចនាយករដ្ឋមន្ត្រី ហ៊ុន សែន ដែរ។ ដំណោះស្រាយនោះ គឺ សម្ដេច ហ៊ុន សែន បានបញ្ជាឲ្យរឹបអូសដីសម្បទានសេដ្ឋកិច្ច ដែលមានជម្លោះដីធ្លីជាមួយប្រជាពលរដ្ឋ យកមកគ្រប់គ្រងវិញ ហើយយកដីនោះ បែងចែកឲ្យពលរដ្ឋវិញ។ ជាមួយគ្នានេះប្រមុខរដ្ឋាភិបាល ក៏បានបញ្ជាឲ្យរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់លោក ជា សុផារ៉ា និងលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ទទួលបន្ទុកដោះស្រាយបញ្ហានេះ។ រដ្ឋមន្ត្រីទាំងពីរ ត្រូវសិក្សាបែបបទមូលដ្ឋាន និងធ្វើចំណាត់ការជាលក្ខណៈគតិយុត្តស្នើទៅតុលាការ ដើម្បីពិនិត្យមើលលើការកាត់សេចក្តីនេះឡើងវិញ។
ក្រោយចប់ប្រជុំជាមួយសមាជិកឧត្តមក្រុមប្រឹក្សាពិគ្រោះ និងផ្ដល់យោបល់ នៃគណបក្សនយោបាយទាំង១៦ កាលពីថ្ងៃទី២៨ កុម្ភៈ ប្រមុខរដ្ឋាភិបាល ក៏ចេញលិខិត ដកអភិបាលរងខេត្តពីររូបគឺលោក ផៃ ប៊ុនវណ្ណៈ និង លោក ស្រ៊ុន ស្រ៊ន់ ដែលជាអ្នកទទួលបញ្ជាចុះទៅអនវុត្តដីការបស់តុលាការកំពូល ដែលសម្រេចឲ្យឧកញ៉ាម្នាក់ឈ្នះក្តីលើប្រជាពលរដ្ឋ នៅភូមិគគីរ ឃុំបិតត្រាង ស្រុក ព្រៃនប់ខេត្តព្រះសីហនុ។ ការដកតំណែងអភិបាលរងទាំងពីររូបនេះ ក្រោយពីមានការអន្តរាគមន៍ ហើយផ្ទុះអំពើហិង្សារវាងកម្លាំងសមត្ថកិច្ច និង ប្រជាពលរដ្ឋប្រមាណ២០០នាក់ ដែលនាំគ្នាទៅតវ៉ានឹងសេចក្តីសម្រេចរបស់តុលាការកំពូល៕
Tag:
តុលាការ
ខ្មែរក្រោក
ដីធ្លី
© រក្សាសិទ្ធិដោយ thmeythmey.com